Iasa: Mang giok
Asal-Usul Raja Kelong
#Uru_ara_cametigaling
#siinjukkawung
#Ka_1s/d5
Sok sanajan langit geus angkeub manéhna terus maksakeun lumampah, ngambah jalan gedé nuhieum kutatangkalan. Manéhna embung, lamun peuting harita kudu mondok ditempat nu sakitu hara-haraeunana. Sanajan enya, manéhna kasebut jalma numasagi ku pangarti, jembar ku rupa-rupa panalar.. tapi lain hartina bisa hirup sangenahna.
Saperti sababaraha waktu kaliwat, méh-méhan manehna binasa nalika keur saré tibra luhureun dahan tatangkalan. Awakna ujug-ujug kabakutet ku hiji oray gedé sarta tuluy dipeureut dihijikeun jeung dahan kijengjing. Salian ti kadua leungeuna teu walakaya tapi oge tanaga beulitan orayteh kacida rohakana. Tong boroning ninggang kajelema, dalah sakadang maung oge bisa bubuk satulang sandi mun geus kabeulit Sanca kembang nu gedéna meh sagedé tangkal jambé.
Untung pikeun manéhna, nugeus mibanda tanaga lapisan tepi katahapan whiguna. Ngalantarankeun awakna bisa leuwih teuas, tibatan dahan kijeungjing sorangan. Meh bareng jeung dahan kijengjing nu ngadadak ngabeletuk remuk, ngamangpaatkeun kendorna beulitan, leungeuna bisa meta nyuaykeun eta beulitan.. malah laju ngirimkeun timpugan sababarahakali nu langsung kena kana careham oray. Sok sanajan teu nepi karemek, tapi geus cukup pikeun siOray kaget tepikeun ka ngalepaskeun beulitanana.
Tah.. nya tidinya pisan, lamun sakalieun leureuh manehna jadi leuwih ati-ati tur tarapti. Sabab sadar yen diluhur langit, masih aya langit. Diluhureun jalma kuat, masih aya mahluk sejen anu leuwih kuat.**
Beuki lila jalan nu disorang beuki geueuman. Cahya panon poe oge geus teu sanggup nembus gegekna tatangkalan anu sakitu hieumna. Ari jalan beuki lilateh beuki nyempitan, lebarna anu tadina bisa dua padatieunteh kiwari ukur sapadatieun. Jadi lamun pareng pasangrok, kudu aya nu ngelehan mundur atawa meped kasisieun jalan.
“Geleger... geleger...” tikajauhan kadenge sada guludug anu gegelegeran. Karasa hawa beuki tiis, kurang-kurangnamah matak noroktok kabulusan.. kawantu aya dilengkob gunung, tempat perjalanan angin barat.
kiWidura: “Mh, ningali naga-naganamah siga rek hujan gede. Lumpat bae kitu? Tapi ke... lamun teu salah di tonggoh aya hiji warung. Enya-ah, sugan bae eta warungteh masih aya. Salian ti bisa ngiuhan, meureun aing oge bisa sakalian ngeusi beuteung…”
Kitu ceuk gerentes hate silalaki, bari jeung ngagancangan leumpangna. Malah lila-lilamah ngan belesat bae manehna lumpat.. metakeun elmu pangenteng badan, awakna lir nu hiber ninggalkeun eta patempatan.
Parat nepi ka mumunggang pasir, hujan can cur turun. Hate silalaki ngarasa bungah, sok komo samar-samar tikaangangan warungteh masih aya. Atuh silalakiteh gura-giru nyampeurkeun bari jeung dina hatena ngagerentes kieu..
kiWidura: “Lakadalah, gening warungteh masih aya. Sahenteuna piraku cai-cai waemah nepi ka euweuh. Malaur geus sakieu hanaangna. Tapi…”
Ceuk siLalaki teu kebat, basa manehna anjog kahareupeun eta warung. Tarangna katembong kerung, panona larat-leret sabab gening tetela eta warungteh sepi siga taya pangunina. Hate silalaki rumahuh, beuteungna karasa ngerebek tanda lapar.
Keur kitu, clak-clak... hujan mimiti cluk-clak kena kana tonggong karasana mani nyecep. Mimitinamah hujanteh carang, ngan beuki lila beuki kerep. Malah dilandeuhmah kadenge sada nu seah ngaguruh matak keueung, pating paralak kana tutuwuhan jeung dangdaunan.
Silalaki gura-giru asup kajero warung, kasampak dijero kaayaan mani kalotor. Meja jeung bangku panjang karebul, malah kaciri ramat lancah pakuranteng meh disakuliaheun juru warung.
kiWidura: “Duh... nyaan warungteh geus suwung, mangkaning beuteung keur meujeuhna lapar kieu yeuh. Hadeuh...”
Kadenge siLalaki ngagerendeng, bari nunda buntelan luhureun meja. Laju nyagigirkeun bedogna sina tantung dina tihang warung. Sedeng panona larat-leret, malah bari tatanggahan sagala rupa. Tetela loba hateup anu bolongor sarta bilik warung anu jebol teu kaurus.
Geleger... geleger... kadenge guludug gegelegeran. Kalacat... silalaki mancat kana meja panjang. Geus kitu, ngan krep bae sidakep sinuku tunggal. Tiwaktu kawaktu, tipoe kapoe.. sanajan sakumaha sibukna manehna teu weleh nyempetkeun diri ngadon meditasi. Ngamangpaatkeun hawa alam, sangkan ngumpul jadi hawa murni dasar-dasar tanaga lapisan.
Jep.. kaayaan ngadadak simpe. Seahna hujan lir nu tilem kajero talaga, dordarna gelap kawas nulaas dijero lautan. Nu karasa ngagalurana sagulung hawa, anu ngocor jeung ngabanjiran satiap aleran getihna.. ngamalir kasakuliaheun uratna.. najan kitu bisa tepung gelang sarta ngumpul dipalebah bujalna.
Samemeh sukma jeung lelembutanana tilem disagaraning puncak meditasi. Ngadadak bae, pancadriana kagarewahkeun kuléngkah-léngkah suku nu arénténg. Datangna ti kiduleun eta tempat, anu tangtuna bae oge datangna ti jago-jago silat anu jumlahna leuwih ti saurang, malah ku jurus harewos Tongo dijero liang bisa kaukur, nepi kamana tingkat sirna bobot nu keur lalumpatan kapalebah dinya.
Darpan: “Aya warung euy! Kumaha mun urang ngiuhan heula?” kadenge diantara ngaguruhna hujan, aya nu cacarita.
Samud: “Heueuh nya hayu, dari pada ngahodhod kabulusan ditengah jalan...”
Badri: “Tapi kumaha mun dijero aya siWidura?”
Darpan: “Nya ati-ati we naha, ongkoh tujuan urangmah teu boga niat jahat…”
Badri: “Heueuh nyahayu...”
Tembal sababaraha urang baturna cowong. Malah dipungkas ku ngagelegerna gelap matak katorékan. Samemeh eta komplotan asup, siLalaki geus ngajorelat manten kapara seuneu.. ngahiji jeung pancaraken nu geus barutut. Hatena panasaran, sabab bieu ngaran manehna bet disabit-sabit jeung dina logatna siga-siga nu teu mibaraya.
Teu lila.. rongheap aya nudaratang. Opat urang jalma nu pakeanana sing sarua hideung, sedeng nu disebut pakean mangsa harita... ukur mangrupa libetan-lebatan kaen, mungkus sakujur badana.
Nu narik perhatian manehna, tetela eta opat urang jalmateh marekel bedog panjang, anu wangun jeung rupana jelas keur tarungan. Tidieu katingali, yen eta opat urang jalmateh mangrupakeun jago-jago tiwalungan talaga atawa nu disebut dunya pasilatan. Malah kadenge hiji diatarana aya nu cumarita, sorana serak bangun eungap siga jalma anu boga panyakit mengi.
Darpan: “Hhhh! Teu sangka elmu pangenteng badanna luar biasa, urang sakabeh nepikeun ka kapalingan gerak...”
Samud: “Silaing tong héran, Darpan. siWidura mémang murid kamemet ki Bundarwastu, tangtu bae sagala-galana weléh dinomer hijikeun...”
Darpan: “Wah... kamemet naon? Mun enya manehna murid kameumeut, mustahil diutus ka cameti galing nu jelas-jelas keur ditimpa prahara hebat...” tempas Darpan anu sorana eungap téa.
Samud: “Ieu ujian, lur.. DiPancaruntah manehna geus taya lawan. Pon kitu deui diwewengkon Sundapura, geus jarang jalma nu mampuh nandingan elmu kanuraganna...”
Darpan: “Waahhh.. Memangna silaing geus kungsi nyaksian manehna Bitotama, Samud?”
Samud: “Nya acan, ngan ceuk beja kitu. Satiap manehna bitotama, teu weleh unggul dinu jadi lawana.”
Darpan: “Hhhh! Ngarana béja can tangtu benerna. Aya paribasa omonganmah leuwih harus batan goong, salawasna teu weleh diaya-aya jeung digegedékeun! Saran ti urang nya yeuh, tong gampang percaya ka nu can katenjo. Sabab bisa wae lohong, ukur neang ngaran...” Ceuk si eungap keukeuh sinis ka jalma anu keur diupatna.
Samud: “Tapi siWidura murid kamemet kiBundarwastu, geus lain jadi rusiah umum Darpan, euy…”
Badri: “Bener…” baturna nu saurang deui anu sirahna butak milu nyambungan. “Malah ceuk selentingan cenah manehna geus dibaktakeun jadi calon tutuwa padepokan Pancaruntah. Padahal umurna moal kurang ti 22 taunan...”
Darpan: “Nya, justru didieu nu jadi akar permasalahannanateh Badri, Samud. Silaing nyaho pangna siWidura nepikeun kadiutus kacameti galing sosoranganan?” ceuk siEngap bari rut-ret katilu urang baturna.
Badri: “Nya apal.. cenah pangna manehna indit sosoranganan kacameti galingteh, alatan kabeulah bencah ku masing-masing pagawean anu teu barisa ditunda-tunda…”
Darpan: “Hahaha...” sieungap atawa Darpan seuri bangun ngécé, “Beja nu sumebar memang kitu, lurr. Tapi perlu dikanyahokeun, pangna siWidura tepikeun kapaburincai jeung batur-baturnateh, sasat hasil pagaweanna dulur sapagurona sorangan nu hayang nyieuhkeun manehna diPancaruntah.”
Samud: “Baruk! Tapi bet asa piraku Darpan, euy. Piraku dulur siWidura aya nu boga hate julig kitu?”
Badri: “Heu-euh.. dikolong langit ieu, saha nu teu apal ka siPanca tunggal? Nu kasohor ku kakompakan jeung Rasa duduluranana. Piraku diantara maranehna aya nusilih pakieuhkeun...” ceuk Badri anu sirahna Butak bangun anu teu percaya.
Darpan: “Silaing duaan tong kabobodo tenjo, euy! Diluarna bae memang kacirina kitu, tapi dijero? Hh! Gorowong siga tangkal dihakan kirinyuh! Dengekeun iyeuh, lamun urang pirajeunan daek nyalusur riwayat padepokan, sakuduna nu diangkat jadi tutuwa padepokanteh nya kiRundayan.. murid kahijina kiBundarwastu. Lain ngabaktakeun siWidura anu kasebutna murid paneungah, nu matak pantes lamun kiwari siWidura aya nu ngakalakeun ku cara diantep sosorangan muru cameti galling anu keur diLanda prahara hebat…”
Samud: “Jadi pamikir maneh kasarnamah siWidurateh diparabkeun, kitu?”
Darpan: “Hm, bener, euy.. memang kitu.”
Samud: “Tapi naha yakin ku cara kitu siWidura baris binasa diCametigaling?”
Darpan: “Kauala yakin pisan, euy.. sabab lamun maraneh apal kanu jadi Rajapatina pasti bakal kaget…”
Samud: “Memangna saha kitu?” ceuk Badri panasaran, pon kitu deui dua urang baturna. …”
Darpan: “SiInjuk kawung, euy...’
Samud: “Saha? siiInjukkawung?’
Gegeger… cacap nyarita kitu, kadenge sora gelap anu ngageleger matak katorekan. Nu opatan kuat karajol rarewaseun, pon kitu deui siLalaki anu nunyumput luhureun Paraseuneu. Meh-mehan manehna oge ngagubrag, mun seg teu kaburu ngerahkeun elmu sirna bobotna. Kakara sanggeeus bumi eureun ngageterna, kadenge Darpan neruskeun deui caritaanana.
Darpan: “Bener euy, siInjukawung…”
Samud: “Tapi ceuk beja siInjukkawung Saumur jeung aki guru urang anu kiwari geus sampurna, piraku aya jalma anu sanggup hirup tepikeun ka sakitu lilana?’
Darpan: “Beja tinggal beja, dongeng-tinggal dongeng, euy. Buktina memang kitu, siInjuk kawung kiwari geus muncul ngadon nyebarkeun Rajapati diCameti galing…”
Samud: “Hmm… lamun eta beja bener ayana, bisa jadi siWidura tamat Riwayatna…”
Darpan: “Bener, sarta tarekahna jalma anu dengki tea.. laksanana kalawan nyugemakeun. Nyatana hasil nyieuhkeun siWidura ti padepokan Pancaruntah…”
Nu tiluan arunggut-unggutan, demi ngadenge kateranganana Darpan sarupa kitu. Pon kitu deui jinisna, anu kiwari keur nyumput luhureun para seuneu tea. Hatena bener-bener kaget demi ngadenge, ucap-ucapannana ieu opat urang jalma. Pangpangnamah ucapanana sieungap, anu nelah kiDarpan.
Lepas antara bener henteuna eta obrolan. Nujelas, caritaan sieungap surup jeung kanyataanana. Kiwari.. dirina nyorangan, nampa tugas tipadepokanana sangkan ngarengsekeun hiji masalah anu keur lumangsung diCameti galling.
Manehna katut dulur-dudulurna paburincay, kabeulah bencah kumasing-masing tugas nu teu barisa ditunda jeung sarua pentingna.***
Masih seger dina ingetannana, kadenge guruna mapagahan kamenehna ku sorot mata anu kuyu bangun anu ngemu kahariwang anu pohara. Dameureun jauh-jauh geus kabade, yen sakali ieumah lawanteh beurat kacida.
Guruna: “Widura, sabenerna bisa bae kami ngabatalkeun ieu tugas. Tapi janji tinggal janji. Jiwa kamanusaan kudu tetep diajegkeun, pangpangna ku pihak urang numemang mampuh pikeun ngalaksanakeunana. Kiwari sakumna rahayat Cameti Galing keur butuh ku pitulung, lamun lain ku urang rek kusaha deui...”
kiWidura: “Guru, saur abdi oge mugya salira masing tenang. Murid tangtos baris ngalaksanakeun ieu tugas kalawan iatna...”
Guruna: “Hhh...! Sakuduna ieu tugas keur Andika limaanen. Tapi Hyang Widhi ngaguratkeun carita sejen...”
Masih dina kaayaan kuyu, guruna ngongkorongkeun hiji liontin lebah beuheungna.
kiWidura: “Ieu... ieu... naon, guru...”
Guruna: “Pake bae, dina hiji waktu ieu liontinteh baris aya gunana...”
kiWidura: “Hatur nuhun, guru...”
Guruna: “Hmm.. tah ayeuna regepkeun, kaula rek mere peupeujeuh...”
kiWidura: “Mangga...”
Guruna: “Teu salawasna bitotama kudu dipungkas ku kaunggulan. Jeung teu salawasna bitotama, kudu dipungkas ku kabinasan! Aya kalana urang kudu mundur jeung aya kalana urang kudu maju. Coba.. naha andika paham, Widura?”
kiWidura: “Pa.. paham, guru.”
Ceuk manehna mangsa harita, bari jeung can rada ngarti. Kiwari sanggeus ngadenge obrolan Badri saparakanca kakara sadar, horeng lawan anu baris disanghareupananateh lain jago sambrangan. Kasebut jago sakti anu geus jarang tandingna.
Bareng jeung hujan nu mimiti raat, manehna geus aya ditempat nu rada anggang ti Badri saparakanca. Malah keur lumampah nyorang jalan satapak anu sakeudeung deui cenah tewreh tepi ka anu dituju.. nyatana kadipaten Cametigaling.
Jauh hanteu burung cunduk, anggang hanteu burung datang. Kira wanci panon poe tunggang gunung, ahirna manehna tepi katapel wates anu dicirian ku dua tumpukan batu bata anu ngapit kenca katuhueun jalan. Eta tumpukan batu bata teh mangrupa gugunungan, anu disatiap puncakna dipsangan hulu buta.
ki Widura: “Lakadalah, gening teu burung nepi…”
Ceuk kiWidura bari jeung ngajanteng hareupeun lawang. Panona melong kajalan gede, anu ngabulungbung muru ka kadipaten. Keur kitu, hiuk… teu puguh-puguh angin ujug-ujug ngaguruh. Kalakay kuat ka rabeng, persis jajalaneun anu rek disorang kumanehna. Aya sagulung hawa aneh anu sumarambah kana bayahna, hate ujug-ujug pating sareblak dibarung ku jajantungna anu ratug tutunggulan.
ki Widura: “Hm.. teu salah. Lamun ieu kadipaten keur dirumrum ku prahara hebat! Buktina tacan naon-naon, hate aing ujug-ujug ting sareblak kieu. Hmmm…”
Ceuk gerentes hate kiWidura, bari mimiti ngalengkahkeun sukuna ngaliwatan eta dua tumpukan batu bata minangka gerbangna. Panona terus larat-leret nitenan kaayan disabudeureunana. Jalan beuki barala, jukut jeung tutuwuhan mani ngagigidig nutupan sabagean jalan padati. Sedeng kaayaan bener-bener sepi, taya jalma anu ngulampreng.
Heuleut sababaraha waktu tiharita, srog.. kiWidura tepi kahiji tempat. Tidinya, aya sabubuhan manuk Rangkong keur ngarubung-rubung welasan bangke, ngan bangke naon kumanehna can kaciri sabab kahalangan ku eta welasan manuk rangkong tea.
Pangangguran sabubuhan manukteh dibaledog. Buriak.. manuk rangkong alias manuk bangke teh ngaburiak bari rame disarada. Teu lila geus tarurun deui, malah tuluy ting galapruk ngahanca hakaneun nu tinggal sautak-saeutik deui.
Lain deui kiWidura ngagebegna, sabab tetela anu keur dirubung-rubung manuk Rangkongteh, welasan layon jalma sarta lamun ningali kana pakeananamah bet siga-siga prajurit karajaan. Ngan prajurit karajaan mana, manehna can sidik dapuguh ukur saliwat.
ki Widura teu wani ngadeukeutan. Sabab sadar, dina layon nu geus sakitu buruknateh, kakandung hiji jaram nu leuwih bahaya tibatan peurah Oray Centong (Sinduk). Leuwihna ti kitu eta jaram bisa nepa, ngaliwatan hawa disabudeureunana.
Ku kituna manehna terus bae nyalingker ka kencaeun jalan, laju ngagedig neruskeun deui lalampahanana.
Langit geus mimiti poek, cahya layung mingkin surem.. sedeng hawa kaambung bau, nandakeun yen disabudeureun eta tempat loba bangke jelema anu teu kapulasara.
Kaayaan karasa geueuman, jalan tetep sepi sok padahal geus deukeut kalawang kori. Malah kaciri garduh jangkung, lapat-lapat dantara medemna cahaya langit.
Ahirna, srog.. kiWidura tepi kalawang kori Cametigaling. Deui-deui manehna ngaranjug, sabab dilebah dinya oge.. aya welasan layon nepikeun kanyocok. Malah teu jauh tidinya, aya bangke munding sarakit kumplit jeung padatina.
Eces ayeunamah katingali, rata-rata layonteh binasa ku pakarang seukeut.. diantara bae aya nu beuheungna meh sapat, nu beuteungna budal-badil, malah aya nu sakujur awakna rungseb karajam peso tengor. kiWidura gogodeg, ngabayangkeun katelengesan jalma anu ngalakukeunana.
kiWidura: “Mhh... tetela kejem jalmateh. Nepi ka tega ngalakukeun hal sarupa kieu? Malah… mh,”
Ceuk kiWidura teu kebat, basa kaciri dintara welasan layonteh aya layon budak sagala rupa. kiWidura jadi mikir, sabab ceuk selentingan najan siInjukkawung kasebut golongan hideung tapi manehna cukup gagah. Teu samodel kajadian anu kiwari keur kaciri hareupeunana.
kiWidura: “Rada aya nu aneh, sakuduna sakur jalma nu jadi korban siInjukkawung ragana bakal mareureut teu bina ti regang nu ngarangas. Tapi gening ieumah bet siga urut tapak pakarang seukeut? Mh, naha enya kitu palakuna siInjukkawung? Atawa aya jalma sejen nu nyaruk ngarana wungkul?”
kiWidura jadi teu beak-beak nyamikir, sedeng tikitu ari panonamah tuluy larat-leret nitenan kaayaan disabudeureunana.
Breh... dihiji tangkal kaciri aya hiji layon. Dadana kapanggang kutumbak parat nepi kana tonggong, sarta teu jauh tidinya aya hiji tulisan ku guratan getih! Ngabaris dina dahan nua aya gigireun eta layon.
Sedeng unina kieu; “Sing saha-saha nu kumawani kabur ninggalkeun ieu kadipaten, dijamin binasa! contona, saperti ieu komplotan!”
Kitu ceuk eta tulisan nu tetela mangrupa hiji ancaman, nu tangtuna bae oge ditujukeun ka sapangeusi Kadipaten Cametigaling sangkan ulah kumawani kaluar ninggalkeun lembur.
Keur larat-leret kitu, “Siut-siut-siuttt.. Gurilap!”
Ngadadak dinubala aya nu ting gurilap, sanajan teu kaciri naon-naona, tapi tina hiukna angin kumanehna geus bisa ka teguh.. naha sabangsa naon nu nyerang kamanehna kiwari. Ku kituna dina gerakan anu kacida tapisna, kiWidura langsung ngagerakeun pigeulang leungeuna kana palebah cangkeng. kiWidura mesat gobangna dina gerakan anu kacida gancangna.
“Siuuttt…” “Trang...! Trang...! Cring, buricak...”
Sababaraha kali kadenge sada nu ting belentrang, disusul ku ting buricakna kembang seuneu disabudeureun eta patempatan. Ukur sajongjongan, serangan demit nu sakitu bahayanateh benang disapu kujurus Gurat Bumi dina Elmu Panurihan.
kiWidura: “Jago silat timana, kaluar! Ulah sumput salindung miyuni hayam kabiri...”
Ceuk kiWidura susumbar bari ngabar bedog, panona terus larat-leret nitenan kaayaan disabudeureunana. Sugan jeung sugan manggih gerakan musuh, boh kelemengna boh juringkangna. Tapi tetela.. musuh bener-bener apik, buktina meh saban tempat diteang teu aya gerakan naon-naon, ari lain ukur ting kulupurna dangdaunan anu katebak angina.
Sanggeus nu ditangtangna taya tembong kaluar, lalaunan sukuna ngalengkah ngadeukeutan balati nu balatak teu jauh timanehna. Diantara welasan balatiteh, aya hiji peso nu perahna dibulen kulawon bodas. Manehna ngaduga, eta lawon mangrupa pesen tinu jadi musuhna.
Da jeung enyana, sanggeus eta lawon dibébérkeun tetela eta lawonteh mangrupa pamepeling sakaligus ancaman tinu jadi musuhna. Sedeng unina, kieu; “Saha bae Andika tinggalkeun ieu patempatan! Kajaba hayang sanasib jeung Prajurit Sunda nu aya ditapel wates kadipaten. Kaula siInjukkawung..”
kiWidura ngagebeg, demi apal ka welasan layon anu tadi dirubung-rubung tea ku manuk Rangkong. Malah bari jeung angeur waspada, manehna ngagerentes kieu,
kiWidura: “Hm, jadi tetela.. welasan layon anu tadi binasa ditapel watesteh para prajurit Sunda. Hmm... tapi aing teu percaya upama Andika siInjukkawung! Heup.....”
Ngadadak awakna ajleng-ajlengan, nyingkahan welasan layon nu nyocok dilawang kori. Ukur sajorelat, sukuna geus nangtung luhureun garduh jangkung nu aya kenca katuhueun lawing kori. Panona terus larat-leret, sedeng bedog geus disarungkeun deui teu kanyahoan kumaha carana ngasupkeunana.
Deui-deui elmu harewos tongona dipetakeun, rupa-rupa sora kontan kadenge.. timimiti sora sato leutik, tug nepi ka sora sato gede. Nepikeun ka ahirna, ngadadak bae kadenge sora lengkah suku anu keketeyepan dipalebah hiji pipir imah.
Ku kituna ngan jleng bae manehna luncat, diluhur garduh anu sakitu luhurna. Basa sukuna nincak lemah langsung ngeper deui, sarta ngajorelat muru kapalebah sora anu di duga gerakan hiji jalma.
siTaregos Hideung: “Eeh…”
Kadenge siJalmateh ngagero lirih, dumeh teu nyangka gerakanana bisa kapanggih. Ku kituna, ngan belesat bae manehna lumpat ninggalkeun panyumputanana.
kiWidura: “Montong kabur kisilah, dagoan kaula... heup!” ceuk kiWidura bari saterusna lumpat ngabelesat, ngudag musuhna nu jejerih ninggalkeun pakalangan.
Bieu, sanajan ukur saliwat kaciri musuhna ditaregos warna hideung. Sarta ngagantungkeun bedog panjang lebah tonggongna, kiwari musuhna geus ngiles deui kahalangan ku pengkolan jalan.
Jleng-jleng-jleng… kusababaraha kali ajleng-ajlengan, manehna geus hasil nenjo musuhna. Nu terus meleteng muru kajero kadipaten.
Breh, ebreh.. musuhna memang ngagandong bedog panjang. Gerakana estuning kesit, nepikeun ka sakitu jauhna manehna tacan sanggup nyusul sumawona ngadeukeutan. Eta ukur nuduhkeun, yen siTaregos hideungteh mibanda wewesen anu teu benang dianggap enteng.
Kakara sanggeus silih udag cukup lila, kiWidura hasil ngadeukeutan nu jadi musuhna. Jarakna meh dua tumbakan, manehna yakin asal satumbak jarakna Ajian Tapak Genina, baris mampuh kena kana sasaran.
Tapi.. teu kira-kira kiWidura ngagebegna, basa siTaregos hideung ngadadak malik bari ngebutkeun tungtung jubahna.
“Buurisattt...” lir hujan girimis, deui-deui peso tengor langsung rabeng mapag awak kiWidura nu keur kumalayang dina lemah.
kiWidura: “Kurang ajar, Hiaahhhh…!”
kiWidura nu memang geus nyiapkeun jurus Tapak Genina langsung ngagorowok, bari metakeun eta ajian. Sarangkum hawa panas langsung ngagelebug, mapag welasan peso tenggor.
“Hiukk…” “Duaarr... Blegh!”
Kadenge sora nu ngabeledug pasusul-susul. Dorongan kahiji ngancurkeun welasan peso demit nepi ka jadi silalatu, dorongan kadua numbuk dada lawan ku samberan angina mungkul.
Siwawalun: “Hukhhh...”
Kadenge SiWawalun ngaheruk, awakna tepikeun ngangabelesat katukang, terus nabrak pager benteng kuta tepikeun ka burakrakan. Bross... nobros pager kai. Kebat kajero nepikeun ka jepna jempe taya nu kadenge.
Sedeng kiWidura sorangan awakna tepikeun kajujumpalikan katukang, teu bisa lepas tina mamalana. Dada karasa eungap, ambekan sesek, malah aya sagulung hawa haneut nyurungkuy kaluhur. Untung manehna kaburu ngatur napas, ngalantarankeun eta hawa nu bau tur hanyirteh teu nepi ka kaluar kautahkeun. Tidieu kumanehna bisa kaukur, yen kakuatan lawan memang lain bantrak-bantrakeuneun.
Celegedeg! Manehna nangtung dinu rada anggang. Pikeun sakedapan manehna can mampuh naon-naon. Kakara sanggeus dadana longsong jeung ambekanana normal, kalawan pinuh ku kawaspadaan manehna mimiti mariksa kaayaan siWawalun, nu tadi macleng nobros pager kai tea. Manehna yakin kiwari siWawalun keur ngagoler dina kaayaan dadana anu tutung. Ceuk tadi ge tong boroning awak manusa, dalah batu cadas oge baris beulah mun ka timpug ku ieu ajian.
Tapi bet matak kaget, siwawalun raib teuing kamendi. Nukatenjo ukur rebahna kekembangan nu buyatak pinuh ku getih seger matak ketir. Pikeun sakedapan manehna jadi ngahuleng, neguh-neguh nu geus tumiba kamusuhna.
kiWidura: “Aneh... naha kamana cenah siWowolekteh? Maoal kitu aya nu nyumputkeunmah? Hm, bisa jadi! Sabab mustahil aya jalma nu sanggup lolos tina maut, mun kabeunangan ku Tapak geni aing…”
Kitu ceuk gerentesna bari anger waspada. Panona tuluy larat-leret, nepikeun ka ahirna bentrok paneuteup jeung hiji wawangunan anu gede kacida. Manehna kontan ngagebeg, sabab sadar yen eta wawangunan badagteh tangtu karaton Cametigaling.
Ngan nya kitu, sanajan eta wawangunan agréng tur badag, tapi tetep kaayananamah sepi taya jalma saurang-urang acan.
“Blig! Blig! Blig.. manehna ngahaja leumpang di beratkeun, sorana pating gareblig nepikeun ka ngandung aweuhan. Nu dipalar aya jalma nu kapancing kaluar, tapi geus kasakitu sajauhna anger taya jalma saurang-urang acan.
kiWidura: “Sampura, sun...”
Kadenge manehna uluk salam sugan aya jalma anu nembalan. Tapi sanggeus rada lila tetep jempling, taya anu nembalan.
kiWidura: “Sampura, sun...”
Pikeun kadua kalina, manehna uluk salam malah ayeunamah leuwih bedas tibatan tadi. Tapi anger dijero taya nu nembalan ukur aweuhanana bulak-balik siga nu ngalelewean.
Nya dina kaayaan kitu, dak dumadak manehna ngagero disusul ku awakna anu ngadadak ngajaul kaluhur. Sababaraha sinar katembong ting belesat, ngaliwat handapeunana.
“Paralakk…” deui-deui aya pakarang demit langsung naranceb kana tembok benteng, persis tukangeun manehna tadi nangtung. Eta pakarang mangrupa puluhan paser naranceb nepi satarengahna.
“Jorelat... kalayang!”
Lir nu hiber awakna terus ngalayang, srta ngajorelat muru hiji rungkun kembang. Sedeng ramo-ramo leungeuna geus ramakah, rek ngaranggem babatok jalma ku jurus Cakar Rajawali Sakti.
Jalma: “E-ehh...”
siJalma katembong kaget, gentak nangtung bari nyamberkeun bedogna rek dipake mapas. Tapi plos... kusakali muterkeun pigeulang leungeun, bedogna poos ngakan angin. Malah samemeh sadar pigeulang leungeuna beunang dicerek laju dipurilitkeun.
Jalma: “A.. aduhhh...”
Sijalma kaget campur jeung nyeri, kapaksa awakna milu muih mun teu hayang leungeuna rampal kapurilitkeun. Buk! Kana bujurna aya nu ngadupak, kontan bae awakna tiJongjolong terus ngagedebut nangkuban. Sedeng bedogna geus pindah leungeun karebut ku kiWudra.
“Bener-bener hade kalakuanteh, Kisilah! Saha anjeun nusabenerna?”
Ceuk kiWidura bari jeung ngalengkah ngadeukeutan. Bedog rampasanana ditudingkeun, kapalebah jalma nu masih ugal-ugil arek hudang. Tapi samemeh, eta jalma ngajawab.. ngadadak bae tukangeun archa butha aya dua jirim nu ting garajleng megat jajalanen. Malah seak... seaakkk... teu kungsi cacarita heula, duanana langsung narajang kalawan angas. Masing-masing bedogna pating hariuk, ngarah badan kiWidura ti dua jurusan.
kiWidura: “Hhh! Kutan kieu urang Cameti galing nyambut tamu? Haiitt...” walon kiWidura bari jeung ngagulak-gileukeun awakna kakenca jeung kakatuhu. Ditungtungan, kumundur salengkah katukang nyingkahan seuseukeut bedog nu liwat sesentian dina rarayna.
Atuh plos-plos-plos! dua serangan bedog kontan plus-plos ngakan angin, tapi nu duaan kesit.. sabab ebreh, bedogna teu eureun tuluy ting hariuk deui ayeunamah leuwih garang batan tadi. Eta bae, kadenge sorana pating hariung, dibarung ku kilatan cahaya anu mantul tina seuseukeut bedog.
Menang sababaraha rintakanmah, kiWidura ukur gulak-gileuk miceun panarajang dua urang musuhna. Anu tetela, sanajan saliwat kumanehna bisa kaukur nepi kamana boh tina elmu pangenteng badan pon kitu deui tanaga lapisananana. Anu lain sing sombong, manehna masih unggul sababaraha tingkat tibatan nu jadi lawan-lawana.
Sok komo sanajan masih ngora, kapanan manehnateh beunang kasebut murid kamemet kiBundar wastu. Anu geus hamper 90 persen ngawaris elmu bedog Pancaruntah kaasup elmu Gurat bumi dina elmu panurihan.
Ku kituna, nalika aya bedog ngaliwat luhureunana, sakilat manehna ngaguratkeun bedog rampasanana, nu diarah dada lawan. Sanajan ukur guratan, tapi lamun keuna geus bisa dipastikeun kulit dada lawan bakal beulah dewang.
siJalma sorangan katembong kaget, rikat manehna jingkrak tapi teu sadar gigir bedog rampasan justru nyabok pigeulang leungeuna.
Plak! “Aduh…” siJalma ngagero, bedogna langsung lepas. Sedeng kiWidura laju ngagorentelkeun awakna di udara, nyingkahan sabetan bedog anu ngarah cangkeng.
Plak! Deui-deui kadenge sada nu ngageplak, basa jalma nu kadua sikuna beunang di cabok ku gigir bedog, najan kitu masih jauh dina bahaya.
Pamungkas kiWidura nutup gerakan jurusna kujalan mapas ikeut lawan nepi ka lalesotanana. Najan kitu, teu nepi ka motong buuk sumawona nyilakakeun sirah lawan-lawana.
“Prok-prok-prok..” ngadadak bae, kadenge sada anu kekeprok sababaraha kali. Disusul ku norojolna hiji jalma nu buukna geus cetuk dawuk. Awakna jangkung kuru, tapi katembong keker.. malah kaciri urat leungeuna ting raringkel, tanda manehna mibanda tanaga lapisan nu kacida hebatna.
kiJantaka: “Hebat! Hebat! Bener-bener jurus bedog nu kacida hebatna. Kaula bener-bener salut! Naha andika urang Sanggabuana?” Pikeun sakedapan ki Widura melong heula eta jalma, teu lila sungkem bari pokna.
kiWidura: “Leres, nun. Sim kuring ti sanggabuana. Upami dipercanten, wasta simkuring Widura...”
kiJantaka: “Hahaha! Naha Andika nu nelah siRajabedog Sarebupati? Salah saurang tilima sadulur nu disebut siPanca Tunggal?”
kiWidura: “Sadaya-daya, nun. Mung jujuluk siRajabedog Sarebupati, eta sebatan kaom golongan nu diageung-ageung. Sim kuring teu wararantun nganggona...”
kiJantaka: “Andika teu perlu ngasor sarupa kitu, Widura. Najan kumaha kahebatan andika geus kasaksi, jujuluk siRajabedog Sarebupati memang teu kosong...”
kiWidura: “Hatur nuhun atas pamujina, kai...”
kiJantaka: “Najan dikukumaha, ku hadirna Andika ka ieu patempatan pikeun kaula saparaknca geus ngarasa bungah. Anu sugan jeung sugan bae, pepedut nu salila ieu gumulung diCametigaling bisa disuaykeun kalawan nyata...”
kiWidura: “Hatur nuhun, sun. Neda piduana bae...”
kiJantaka: “Hmm... pasti! Pasti ku kaula didungakeun, Widura. Tapi... kamarana batur Andika nusejena?”
kiWidura: “Awon nu kapihatur, sun. Dulur-dulur sim kuring sadayana, nuju kapapancenan ditempat anu sanes. Jadi pangapunten anu dungkapteh mung abdi nyalira, mugya bae teu ngajantenkeun renggat panggalih...”
kiJantaka: “Ih.. atuh nya tangtu bae henteu, Widura. Malah sabalikna kaula saparakanca nu kudu menta dihampuramah, sabab lain ngabageakeun tamu sakumaha mistina.. ieumah bet kalah hayoh diserang ngababi-buta. Jadi.. sakali deui nu kudu menta dihampuramah nya kaula saparakanca..”
kiWidura: “Urang pada-pada silih lubarkeun bae, nun. Mugya ieu kasalah pahaman teh sing aya mangpaatna. Nu penting ayeuna, diantara urang tos teu geuneuk teu maleukmek, balungbang timur jalan gede sasapuan...”
kiJantaka: “Ha,ha,ha... bener-bener. Enya kudu kitu, Widura. Tetela sikep anjeun bener-bener gagah, teu sempit jeung teu heureut pangdeuleu…”
kiWidura: “Hatur nuhun sun, atas sagala pamujina. Tapi naha kengeng sim kuring apal kasalira katut nu sanensna?”
kiJantaka: “Hmm…” siCetuk Dawuk manggut-manggut, geus kitu pok nembal kana pananyana kiWidura. “Ngaran kaula, Jantaka. Eta nu bieu ku andika dirubuhkeun sanyatana para senapati Cametigaling. Lamun andika percaya, kaula pamimpina ieu Para senapati...” ceuk siCetuk Dawuk, bari ngabagikeun paneuteupna ka nu tiluan nu masih ting puringis.
kiWidura: “Hatur nuhun tos diwanohkeun...”
kiJantaka: “Hmm.. Pada-pada, Widura..” ceuk siCetuk dawuk, nu nelah kiJantaka.
kiWidura: “Mangga masrahkeun ieu bedog, sarta pangapunten tos kumawantun...”
kiJantaka: “Teu jadi masalah Widura, teu jadi masalah. Malah kaula nganuhunkeun, dumeh Andika teu nibankeun leungeun jahat ka parasenapati kaula…”
kiWidura: “Teu wararantun, sun…”
kiJantaka nampanan bedog rampasan, malah harita keneh langsung dipasrahkeun ka kiRisang jalma nu tadi pangheula dirubuhkeun ku kiWidura.
kiJantaka: “Tah ayeuna, hayu... urang ngadeuheus ka Gusti Adipati. Margi tos lami, inyana nunggu-nunggu urang Sanggabuana...”
kiWidura: “Oh.. mangga. Sareng hatur nuhun...”
kiJantaka: “Sugri, tuluykeun tugas andika. Sarta tetep masing iyatna, bisi musuh datang teu pupuguh…”
Sugri: “Unjuk sumangga, kai…”
Walon kiSugri bari unggeuk, sedeng kaciri ari raraynamah masih keneh sarepa. Sabab najan kumaha, maranehna tiluan masih keneh can percaya lamun ukur sageprakan bisa dilagrakeun ku budak anu umurna paling banter 22 taunan.
kiJantaka: “Widura, hayu...”
kiWidura: “Mangga tipayun...”
Ceuk kiWidura rengkuh, tuluy sungkem kanu araya didinya. Geus kitu bral... duanana laleumpang ninggalkeun pakarangan karaton. Sedeng tilu senapati tuluy ting kelemet, asup ka masing-masing panyumputanana deui.
Geus kitu bral... duanana miang ninggalkeun pakarangan karaton. Saterusna kiWidura dibawa kahiji jalan rusiah, anu mana eta jalanteh muru tempat pangungsiana juragan Adipatisura saparakanca. Eta jalan marungpa torowongan panjang anu bulak-belok jeung loba anu nyagak, mun teu apalmah matak nyasab kabalason.
kiWidura: “Janten urang cametigalingteh teu carem sadayana, kai?” kadenge kiWidura mimiti tumanya.
kiJantaka: “Hmm... nya tangtu wae henteu, Widura. Ngan nyakitu, sawareh hasil diungsikeun sawareh deui loba anu binasa...”
kiWidura: “Tadi dipalebah lawang kori, abdi ningal welasan layon balatak. Diantarana aya murangkalih sagala rupa, naha aranjeunateh warga Cametigaling nurek ngarungsi?”
kiJantaka: “Eta memang bener widura, maranehnateh warga Cametigaling nu teu tahan ku kalaparan sarta rerencepan kaluar bari tanpa karana idin. Tapi tibatan hasil, kalah tinemu jeung ajalna...”
kiWidura: “Musuh bener-bener telenges, kai. Tapi palebah dieu aya nu rada teu kahartos...”
kiJantaka: “Teu kaharti kumaha, Widura?”
kiWidura: “Saur selentingan, nu kiwari jadi banaspatiteh cenah siInjukkawung. Nu satiap korbana bakal meureut teu beda ti regang garing...”
kiJantaka: “Hmm... enya, terus?”
kiWidura: “Tapi abdi ningal para korbanteh rata-rata binasa ku kapakarang seukeut! Malih sababaraha urang diantarana, aya nu warugana karancang jadi korban welasan Peso tengor. Cobi digalih, naha ieu teu matak nyurigakeun?”
kiJantaka: “Hmm...” ki Jantaka unggut-unggutan, “Naha Andika ragu, lamun musuh nu keur ngagalaksakteh lain siInjukkawung?” kiWidura unggeuk tanda ngaenyakeun.
kiJantaka: “Sabenerna.. kaula katut juragan Adipatisura kungsi baroga pikiran nu sarupa kitu. Tapi terus terang bae, samemeh uru-ara lumangsung.. saurang jagabaya gusti adipati, aya nu perlaya dina kaayaan meureut! Nya persis saperti nu bieu ku Andika disebutkeun...”
kiWidura: “Baruk! Gening kungsi aya kajadian kitu?” kiWidura ngagebeg.
kiJantaka: “Bener. Layona dianterkeun ku para Puragabaya pangawalan barang. Sanajan jasadna geus teu mangrupa. Tapi nilik ciri jeung tanda-tandana, eta jasadteh memang kiRawun...”
kiWidura: “KiRawun.. saha etateh, kai?”
kiJantaka: “Manehnateh papatih kahiji juragan adipatisura...”
kiWidura: “Kutan kitu...?”
Samemeh ki Jantaka nyarita deui, maranehna tepi manten kahiji tempat. Nu matak kaget, didinya loba jalma nu keur ngariung. Awewe, lalaki, kolot, budak ngariung dieta rohangan. Bari kaciri masing-masing warugana kuru, baregang tanda kurang barang dahar.
#Hanca
kiWidura: “Kai saha maranehnateh?”
kiJantaka: “Nya ieu pisan warga Cametigaling nu hasil disalametkeunteh, Widura…”
kiWidura: “Tos sabaraha lami, arayana didieuteh, kai?”
siPanjaga: “Lamun teu salah geus hamper genep bulan leuwih, Widura...”
kiWidura: “Baruk! Geningan tos cukup lami?” kiWidura ngajenghok.
siPanjaga: “Bener. Sanajan maranehna bisa lolos dina leungeuna siInjukkawung. Tapi maut nu leuwih nyata tuluy ngukuntit, nyatana mangrupa panyakit jeung kalaparan...”
kiWidura unggut-unggutan bari terus rarat-reret nitenan kaayaan disabudeureun eta rohangan. Jep, kaayaan ngadadak jempe basa manehna mimiti ngaliwat kanu ngarariung. Karasa aya puluhan pasang panon neuteup kamanehna, tetepan anu pinuh ka tunggaraan jeung kasangsaraan.
Aya parasaan perih nu nyerését kana hatena, ngabesét leuwih hebat batan seuseukeut baraja sorangan. Nimbulkeun hiji hawa panas ngagolak jeroeun dadana, hiji geduran amarah jeung dengdem kanu geus ngabalukarkeun rayat Cametigaling katalangsara.
Teu kungsi lila duanana geus tarepi deui ka hiji rohangan nu cukup gedé. kiWidura ditinggalkeun sorangan, ari kiJantaka ngaleos.. cenah rek mere laporan ka kanjeng senapati. Pikeun sakedapan, kiWidura ukur larat-leret nitenan kaayaan eta rohangan. Legana eta rohanganteh aya kana opat tumbakanana, dicaangan kurupa-rupa palita nu naraplok dina tembok-tembok guha.
Geus kesel nungguan, guratak kiJantaka datang hanjakal nyorangan, sabab kanjeng adipati nuju aya urusan anu kacida pentingna.
kiWidura: “Jadi iraha kaula bisa tepung, kai?”
kiJantaka: “Paling isuk, Widura. Ongkoh ayeunamah geus peuting, mung bae inyana miwarang sangkan ajeun leureuh heula…”
kiWidura: “Kitu nya teu nanaon, atuh…”
kiJantaka: “Ayeunamah hayu, tuturkeun kaula…”
kiWidura ukur unggeuk, saterusna manehna dibawa kahiji kamar teu jauh ti pangungsian. Sanggeus kiJantaka pamitan, gek.. manehna diuk dina dipan, terus ngahuleng mirage meneng. Sakali-kalieun, kadenge sora jalma nu muharurung atawa nu hog-hag parasea dukating marebutkeun naon.***
Isukna sanggeus manehna dibere sarapan, kakara manehna diangkir ku juragan Adipatisura. Dianterkeun ku Catrik, ahirna manehna anjog katempat kamari basa jeung kiJAntaka tea.
Ari anu disebut juragan Adipatiteh tetela, umurna geus tengah tuwuh. Salirana rada bayuhyuh, calik dina korsi kulit tutul.. diapit ku hiji aki-aki nu dedeg pangadegna Jangkung kuru. Nu matak ngajenghok, ku sorot panona anu moncorong lir mata meong. Manehna apal, nu matana kawas kitu mibanda tanaga lapisan nu geus tepi ka tahapan Whiguna (Puncak Kakuatan Manusa).
kiWidura: “Haturan gusti Adipati, nyanggakeun sembah pangabaktos, nun...”
Adipatisura: “Hmm... teu kudu gugon tuhon palaturan karaton, Widura. Da ieumah ukur dijero guha…”
kiWidura: “Teu wararantun, sun…”
Adipatisura: “Hmm, sok kinyah, diuk didinya...” saur juragan Adipati, bari nunjuk salu nu aya hareupeunana. Sedeng didinya kasampak tilu urang jalma, anu matak kaget tetela maranehnateh anu kamari hasil dirubuhkeun hareupeun karaton.. tayalian kiSugri saparakanca.
Adipatisura: “Tah eta nu tiluanteh, parasenapati Cameti galing. Sok kinyah silih wanohkeun…”
kiWidura: “Hatur nuhun…” ceuk kiWidura bari sungkem, siga euweuh kajadian naon-naon samemehna.. ngajaga sangkan ieu tilu senapatiteh teu ngarasa kaleungitan wibawa payunen sang Adipati.
Nu tiluan tembong males sungkem, bari kaciri rada bareureum teuing era teuing panas ku sikep ieu jajaka. Sanggeusna kiWidura diuk, gigireun nu tiluan kadangu Sang Adipati cumarios deui.
Adipatisura: “Tah, ieu anu calik gigireun kaula kiPatih Darbaseta. Sebut bae anjeuna aki patih, da kaula oge teu weleh nga akikeun. Sabalikna, anjeuna ngaalokeun ka kaula. Tapi panca kakimah teu kudu jadi permasalahan, Widura…”
kiWidura: “Unjuk sumangga gusti adipati, abdi ngiringan. Aki Patih, haturan wilujeng tepang.. nyanggakeun salam pangabaktos ti Abdi…”
Aki patih katembong unggut-unggutan, aya nu aneh.. sorot panon anu tadina moncorongteh ngadadak sayu. Tapi kitunateh ukur sakedapan, kaditu geus ngagebur deui malah kadenge inyana cacarita.
Akipatih: “Hmm, ditarima Widura. Sukur Andika geus datang ka ieu kadipaten…”
kiWidura: “Hatur nuhun, pini sepuh…”
Akipatih: “Tapi… naha Andika bet datang sosoranganan? Mana batur andika anu sejena?” Ceuk Akipatih kitunateh bari neuteup seukeut ka kiWidura.
Adipatisura: “Bener Widura, kamana dulur-dulur Andika nusejena? Mana siPanca Tunggal anu kasohor ku kakompakananateh?” sang Adipati ngiring mairan, kana pananyana aki Patih.
kiWidura: “Numawi… awon nukapihatur, sun. Opat dulur abdi sadayana, bet teu kuhanteu kengeng pancen gawe anu teu tiasa ditunda-tunda. Dina lelesan dieu, ki guru kuanjeun saleresna teu ngaraos manah. Nanging kumargi teu aya pilihan, kapaksa anjeuna ngirimkeun sim kuring sosoranganan. Mugya.. salira ngama’fumna bae, sun...”
Adipatisura: “Hmm... Kaula ngama’lum, Widura. Kaula nga ma'lum. Tapiii... masalahna, musuh sakali ieu sajaba tilicik teh tangoh luar biasa. Tapi.. hampura! Lain kaula boga niat ngaremehkeun, tapi samata-mata kaula nyegah sangkan korban jiwa teu terus nambahan. Sabab perlu dikanyahokeun! Geus loba jago-jago bayaran kaula nu binasa diieu kadipaten. Sakali deui hampura, mugya andika teu nepi kasinggung...”
kiWidura: “Teu sawios-wios, juragan. Abdimah moal kasunggang atanapi kasinggung, malih bingah bae nuaya.. eta nawiskeun yen salira mibanda jiwa anu jembar tur manah anu luhung. Nanging... kanggo urang Sanggabuana, perlaya dina hiji tarungan tos mangrupikeun hiji kasampurnaan minangka jawara nu sajati!”
Adipatisura: “Hm.. bener ceuk kolot, uyahmah moal nepikeun katees kaluhur. Tutul moal ngalahirkeun anak ucing. Terus terang bae kaula salut, ku tekad jeung paniatan Andika...”
kiWidura: “Hatur nuhun, juragan. Hatur nuhun...”
Adipatisura: “Tah.. pikeun saheulaanan, Andika cukup ku ngabandungan bae. Sabab kabeneran.. kaulateh rek ngayakeun gempungan, ngabadamikeun kaayaan nu mangkin werit bae...”
kiWidura: “Unjuk sumangga nun, sadaya-daya...” Ceuk kiWidura, ditungtungan ku sungkem.
Saterusna juragan Adipati jeung nu sejena mimiti ngayakleun gempungan, anu mana cenah dina eta gempunganteh ngadadarkeun ngenaan kasadiaan pangan anu geus saeutik deui.
Sarta ngabahas urang karajaan Sunda anu dipentaan tulung, sangkan ngirimkeun pasukan ngabantu kadipaten cameti galing. Anu cenah nepi kadenget harita, tacan keneh ngurunyung datang. Anu sok padahal korban jiwa geus kacida lobana, sarta kiwari bahaya kalaparan geus nyantong hareupeunana. Puguh kasadiaan pangan tinggal saeutik deui.
Keur kitu, cong.. ngadadak ki Widura sungkem.
Adipatisura: “Aya naon Widura...?”
kiWidura: “Nalika sim kuring anjog ka Cametigaling, abdi diserang ku saurang jalma anu ditaregos. Manehna ngagunakewun peso tengor, hiji diantarana pesoteh anu nu perahna dibulen lawon bodas. Sedeng eta lawonteh mangrupa ancaman kasing saha-saha anu kumawani ngilu campur kana urusan dicameti galling. Tah ieu gera, kaleresan lawona kuabdi dicandak.…” ceuk kiWidura, ditungtungan ngasongkeun lawon bodas ka juragan Adipatisura.
Harita keneh, eta lawon ditampanan laju diaos sajeroning batina. Cacap ngaos eta tulisan, sang Adipati gogodeg dibarung ku rarayna anu ngadadak sepa. Ningal kitu nuaraya didinya, heran atuh teras ngiring maos eta tulisan ka asup aki patih katut tilu urang senapatina.
Adipatisura: “Jadi pasukan Sunda anu salila ieu diarep-arepteh geus barinasa gening, Aki Patih….”
Kadangu sang Adipati ngagerendeng, siga anu ditujukeun kadirina pribadi. Ari anu di ajak nyaritana, nyatana aki Patih Darbaseta ngadadak neuteup seukeut ka kiWidura.
Akipatih: “Terus kumaha carana, Andika bisa lolos, Widura?”
kiWidura: “Abdi tiasa ngungkulanana, aki patih. Malih ku etangan kiwari, sijurujanateh tos sah tialam dunya…”
Akipatih: “Binasa maksud anjeun?”
kiWidura: “Leres, mung sawaktos jasadna diteang teu kapendak…”
Akipatih: “Moalmah manehna hasil ngaloloskeun diri?”
kiWidura: “Kuetangan moal, aki patih. Abdi yakin, manehna pasti binasa. Mung bae, layona pasti aya nu nyumputkeun…”
Akipatih: “Hmm…” kiPatih Darbaseta ngaheneng bari unggut-unggutan.
Adipatisura: “Aki patih, kumaha mun geus kieu? Geningan pasukan anu diarep-arep bisa nulunganteh malah gugur samemeh cunduk katengah-tengah medan laga…”
Akipatih: “Ieu warta masih can bukti saratus persena, adipati. Najan kumaha, urang kudu ngabuktikeunana kucara neang katapel wates kadipaten pikeun …”
Adipatisura: “Hmm… bener oge, aki patih.” Saur sang adipati, ditungtungan ku ngaleret ka tilu senapatina, “Senapati, wayahna ayeuna keneh andika tiluan miang katapel wates. Pariksa welasan layon anu barinasa tea…”
kiSugri: “Rangpung dawuh tutas pangandika, sun. unjuk sumangga…”
Adipatisura: “Ajak sababaraha prajurit, keur batur anjeun disatengahing perjalanan…”
kiSugri: “Unjuk sumangga, sun…”
Adipatisura: “Nam kaituh…” saur sang Adipati satengah anu ngajurungan.
Cedok, nu tiluan nyembah.. atuh geus kitumah nutiluan undur ti payunen sang adipati. Laju miang katapel wates, seja ngabuktikeun ancaman siTaregos hideung anu ditulis dinalawon bodas tea.**
#Hanca
Bagean ka 4
Saditinggalkeuna ku kiSugri saparakanca, pikeun sakedapan Sang Adipati sura jeung kiWidura taya nucacarita. Maranehna ukur ting haluleung kabawa ku masing-masing sawanganana, ukur aki patih sigana anu rada anehteh. Sababaraha kali panona maling leret ka kiWidura, bangun anu hayang sidik kana dedeg pangadeg jeung keureutan beungeut eta jajaka wedalan gunung Sanggabuana. Anu tangtu bae, ieu kaayaanteh karasaeun ku Kiwidura atuh daek teu daek manehna jadi rada samar polah.
Kusabab kitu, ahirna kadenge kiWidura mimiti cumarita pikeun meupeuskeun kaayaan anu karasana mimiti aneh.
“Eu pangapunten, juragan, abdi bade aya taroskeuneun…”
“Rek naroskeun naon, Widura…”
“Perkawis siinjuk kawung…”
“Memangna kumaha?”
“Naha salira teu curiga, upama ieu kaayaanteh ukur pagawean sakomplotan jalma anu ngamangpaatkeun ieu situasi? Margi, beja anu sumebar estu patukang tonggong sareng kanyataanana…”
“Perkara eta, sabenerna geus kungsi dibahas Widura. Tapi bukti jeung latar kasangtukangna memang kitu, rajapati diCameti dimimitian ku tiwasna patih kuring anu warugama meureut persis kakenaan ku Ajian Tunggul Bumi milikna siInjukkawung…”
“Nu matak teu kahartos, kunaon manehna bet teras meupeus keuyang? Saleresna naon kahayangna eta kolot? Margi jelas, kapanan dengdemna parantos kabales…”
“Tah ieu anu jadi kapusing kaula saparakanca ge ge widura, sabab taya anu bisa ngajawab kajaba timaranehna sorangan…”
“Abdi gaduh usul, gusti. Nanging punten sateuacana, sanes hayam mapatahan ngojay kameri…”
“Teu nanaon Widura, tapi rek usul naon?”
“Kumaha mun urang nyebarkeun tulisan disababaraha tempat, anu dipalar sugan jeung sugan manehna daek ngajawab…”
“Hm.. usul hade Widura, kunaon samemehna teu kapikir ku kaula? Aki patih kumaha kira-kirana, naha satuju?”
“Eta usul taya rugina, ku Andika bisa dilaksanakeun Alo Prabu…”
Katembong raray juragan Adipatisura, rada cahayaan, bangun anu pinuh ku panghareupan. Sabalikna, kiWidura beuki ngarasa heran ku sikep aki PAtih anu tiatadi teu weleh merhatikeun ka dirina. Nu matk ngan pok bae, ahirna kiWidura ngedalkeun kaherana ka Akipatih.
“Pangapunten sepuh, kumawantun…” pokna, bari sakali ieumah ditungtungan ku sungkem ka aki patih.
“Hmm… aya naon?”
“Tiatadi salira teu weleh merhatoskeun abdi, naha aya naon, sun?”
“Eu… eu… Te-terus terang bae kaula panasaran kanu kalung Andika. Upama meunang nyaho, timana andika menang eta kalung leontin hejo, Widura?”
“Oh iyeu, iyeuteh pamaparinan ti kiGuru Bundarwastu…”
“Naha menang kaula ngilikan?”
“Oh, tangtos bae sun…”
Sanajan teu ngarti, kiWidura teu burung ngalaan kalung dina beuheungna, laju diasongkeun ka eta papatih Nagri Cametigaling. Dibarengan ku leungeun anu ngageter aneh, eta kolot anu umurna geus 60 taunan teh nampanan kalung berbentuk liontin tea.
Boh kiWidura, pon kitu deui sang Adipati. Ngarasa heran ku polahna eta kolot, tapi duanana teu loba omong angur ningalikeun aki patih anu kalawan taliti ningalian eta liontin.
“Anjeun nyaho kana silsilah ieu liontin, Widura?”
“Henteu, margi kiGuru teu sempet nerangkeun. Mung bae inyana amanat, sangkan ngajaga ieu kalung lir ibarat ngajaga nyawa abdi nyalira…”
“Hmmm…”
Deui-deui sirah akipatih unggut-unggutan. Disajeroning ngilikan eta kalung, ebreh biwirna ngageter semu anu ngunyem caritaan anu ngan ukur kadenge ku dirina sorangan.
Sanggeus seubeuh ngilikan eta kalung, kadenge aki patih nyarita bari masrahkeun deui eta kalung ka kiWidura. Saleretan aya nu ting borelak, dina juru-juru panona anu geus kariput, mungguh matak hemeng anu nyaksian.
“Bener ceuk guru Andika, Widura. Ieu kalung kudu dijaga kalawan iyatna…”
“Memangna aya nu aneh eta kalung liontinteh, aki Patih?”
Kadangu kanjeng Adipati tumanya, bari neuteup seukeut kapapatihna bangun anu pinuh ku silidik.
“Ah henteu oge, Alo prabu. Ngan bae, eta kalungteh ngingetkeun kaula keur mangsa-mangsa anu geus kaliwat…”
“Naha aki patih inget ka Putra, anu tos lami ngantunkeun?” saur sang adipati pinuh ku silidik. Aki Patih ukur ngalieus, teu ngaenyakeun atawa sabalikna.
Ngadadak bae, obrolan kapegat ku ting kurunyungna tilu senapati. Maranehna ngalaporkeun yen naon-naon anu ditulis tina lawon bodasteh bener ayana. Yen ditapel wates, aya sabubuhan layon anu geus meh teu biasa disidikeun. Ngan lamun ningali kana papakean jeung palindung panah, anu naplok lebah dada.. jelas, maranehnateh mangrupa Prajurit-prajurit sunda anu gugur.
“Jadi… lamun kitumah, bener atuh ancaman siInjukkawung anu dikirimkeun lewat peso tenggorteh, Akipatih? Pantesan geus hamper dua warsih pasukan anu diarep-arep datangteh taya ngurunyung, dasinghoreng gening malah gugur leuwih tiheula…”
“Sadaya-daya, nun…”
“Akipatih kumaha lamun geus kieu?”
“Urang cobaan usul kiWidura tadi, urang sebarkeun sababaraha tulisan ditempat-tempat anu sakira bias kabaca kunu jadi musuh…”
“Tapi iraha, akipatih…”
“Sagancangna, alo Prabu…”
Gancangna carita, isukna sakumaha anu geus diusulkeun ku kiWidura tilu senapati cameti galling anu nelah kiSugri, kiRisang jeung kiBaran mimiti napel-napelkeun langlayang kasakuliaheun karaton. Malah nepi ka luareun karaton oge sarua dipasangan, nu dipalar pihak siInjukkawung daek nembongan, atawa ngajawab kana kahayangna Adipatisura saparakanca.
Tapi tetela sanggeus didagoan nepi ka saminggu lilana, pihak siInjukkawung taya malesanan. Tongboroning aya malesanan, euweuh ringkang-ringkangna acan. Teuing ngarasa gimir atawa memang ngahaja, sangkan sang adipati saparakanca bener-bener kateken tur prustasi. Pihak siInjukkawung siga nu bener-bener apal kana pibahayaeun, maranehna siga nu nyaho keur pada ngadodoho ku pihakna juragan Adipatisura.
Kocap dina hiji poe, kabeneran kiWidura keur mariksa sakuliah guha. Damanehnamah cenah diwenangkeun ku juragan Adipatisura, pikeun mariksa sakuliahna. Bet kabeneran manehna ujug-ujug tepi kahiji palataran, pernahna aya diluar guha teu jauh di biwir gawir.
Keur anteng lurat-leret kitu, bet hawar-hawar kadenge sada anu inghak-inghakan ceurik, sakapeung eta sorateh kadenge sakapeung deui henteu. Siga nu ka bawa angin ti jauhna.
Hanca
— di New Orchid Raya Permana.Asal-Usul Raja Kelong
#Uru_ara_cametigaling
#siinjukkawung
#Ka_1s/d5
Sok sanajan langit geus angkeub manéhna terus maksakeun lumampah, ngambah jalan gedé nuhieum kutatangkalan. Manéhna embung, lamun peuting harita kudu mondok ditempat nu sakitu hara-haraeunana. Sanajan enya, manéhna kasebut jalma numasagi ku pangarti, jembar ku rupa-rupa panalar.. tapi lain hartina bisa hirup sangenahna.
Saperti sababaraha waktu kaliwat, méh-méhan manehna binasa nalika keur saré tibra luhureun dahan tatangkalan. Awakna ujug-ujug kabakutet ku hiji oray gedé sarta tuluy dipeureut dihijikeun jeung dahan kijengjing. Salian ti kadua leungeuna teu walakaya tapi oge tanaga beulitan orayteh kacida rohakana. Tong boroning ninggang kajelema, dalah sakadang maung oge bisa bubuk satulang sandi mun geus kabeulit Sanca kembang nu gedéna meh sagedé tangkal jambé.
Untung pikeun manéhna, nugeus mibanda tanaga lapisan tepi katahapan whiguna. Ngalantarankeun awakna bisa leuwih teuas, tibatan dahan kijeungjing sorangan. Meh bareng jeung dahan kijengjing nu ngadadak ngabeletuk remuk, ngamangpaatkeun kendorna beulitan, leungeuna bisa meta nyuaykeun eta beulitan.. malah laju ngirimkeun timpugan sababarahakali nu langsung kena kana careham oray. Sok sanajan teu nepi karemek, tapi geus cukup pikeun siOray kaget tepikeun ka ngalepaskeun beulitanana.
Tah.. nya tidinya pisan, lamun sakalieun leureuh manehna jadi leuwih ati-ati tur tarapti. Sabab sadar yen diluhur langit, masih aya langit. Diluhureun jalma kuat, masih aya mahluk sejen anu leuwih kuat.**
Beuki lila jalan nu disorang beuki geueuman. Cahya panon poe oge geus teu sanggup nembus gegekna tatangkalan anu sakitu hieumna. Ari jalan beuki lilateh beuki nyempitan, lebarna anu tadina bisa dua padatieunteh kiwari ukur sapadatieun. Jadi lamun pareng pasangrok, kudu aya nu ngelehan mundur atawa meped kasisieun jalan.
“Geleger... geleger...” tikajauhan kadenge sada guludug anu gegelegeran. Karasa hawa beuki tiis, kurang-kurangnamah matak noroktok kabulusan.. kawantu aya dilengkob gunung, tempat perjalanan angin barat.
kiWidura: “Mh, ningali naga-naganamah siga rek hujan gede. Lumpat bae kitu? Tapi ke... lamun teu salah di tonggoh aya hiji warung. Enya-ah, sugan bae eta warungteh masih aya. Salian ti bisa ngiuhan, meureun aing oge bisa sakalian ngeusi beuteung…”
Kitu ceuk gerentes hate silalaki, bari jeung ngagancangan leumpangna. Malah lila-lilamah ngan belesat bae manehna lumpat.. metakeun elmu pangenteng badan, awakna lir nu hiber ninggalkeun eta patempatan.
Parat nepi ka mumunggang pasir, hujan can cur turun. Hate silalaki ngarasa bungah, sok komo samar-samar tikaangangan warungteh masih aya. Atuh silalakiteh gura-giru nyampeurkeun bari jeung dina hatena ngagerentes kieu..
kiWidura: “Lakadalah, gening warungteh masih aya. Sahenteuna piraku cai-cai waemah nepi ka euweuh. Malaur geus sakieu hanaangna. Tapi…”
Ceuk siLalaki teu kebat, basa manehna anjog kahareupeun eta warung. Tarangna katembong kerung, panona larat-leret sabab gening tetela eta warungteh sepi siga taya pangunina. Hate silalaki rumahuh, beuteungna karasa ngerebek tanda lapar.
Keur kitu, clak-clak... hujan mimiti cluk-clak kena kana tonggong karasana mani nyecep. Mimitinamah hujanteh carang, ngan beuki lila beuki kerep. Malah dilandeuhmah kadenge sada nu seah ngaguruh matak keueung, pating paralak kana tutuwuhan jeung dangdaunan.
Silalaki gura-giru asup kajero warung, kasampak dijero kaayaan mani kalotor. Meja jeung bangku panjang karebul, malah kaciri ramat lancah pakuranteng meh disakuliaheun juru warung.
kiWidura: “Duh... nyaan warungteh geus suwung, mangkaning beuteung keur meujeuhna lapar kieu yeuh. Hadeuh...”
Kadenge siLalaki ngagerendeng, bari nunda buntelan luhureun meja. Laju nyagigirkeun bedogna sina tantung dina tihang warung. Sedeng panona larat-leret, malah bari tatanggahan sagala rupa. Tetela loba hateup anu bolongor sarta bilik warung anu jebol teu kaurus.
Geleger... geleger... kadenge guludug gegelegeran. Kalacat... silalaki mancat kana meja panjang. Geus kitu, ngan krep bae sidakep sinuku tunggal. Tiwaktu kawaktu, tipoe kapoe.. sanajan sakumaha sibukna manehna teu weleh nyempetkeun diri ngadon meditasi. Ngamangpaatkeun hawa alam, sangkan ngumpul jadi hawa murni dasar-dasar tanaga lapisan.
Jep.. kaayaan ngadadak simpe. Seahna hujan lir nu tilem kajero talaga, dordarna gelap kawas nulaas dijero lautan. Nu karasa ngagalurana sagulung hawa, anu ngocor jeung ngabanjiran satiap aleran getihna.. ngamalir kasakuliaheun uratna.. najan kitu bisa tepung gelang sarta ngumpul dipalebah bujalna.
Samemeh sukma jeung lelembutanana tilem disagaraning puncak meditasi. Ngadadak bae, pancadriana kagarewahkeun kuléngkah-léngkah suku nu arénténg. Datangna ti kiduleun eta tempat, anu tangtuna bae oge datangna ti jago-jago silat anu jumlahna leuwih ti saurang, malah ku jurus harewos Tongo dijero liang bisa kaukur, nepi kamana tingkat sirna bobot nu keur lalumpatan kapalebah dinya.
Darpan: “Aya warung euy! Kumaha mun urang ngiuhan heula?” kadenge diantara ngaguruhna hujan, aya nu cacarita.
Samud: “Heueuh nya hayu, dari pada ngahodhod kabulusan ditengah jalan...”
Badri: “Tapi kumaha mun dijero aya siWidura?”
Darpan: “Nya ati-ati we naha, ongkoh tujuan urangmah teu boga niat jahat…”
Badri: “Heueuh nyahayu...”
Tembal sababaraha urang baturna cowong. Malah dipungkas ku ngagelegerna gelap matak katorékan. Samemeh eta komplotan asup, siLalaki geus ngajorelat manten kapara seuneu.. ngahiji jeung pancaraken nu geus barutut. Hatena panasaran, sabab bieu ngaran manehna bet disabit-sabit jeung dina logatna siga-siga nu teu mibaraya.
Teu lila.. rongheap aya nudaratang. Opat urang jalma nu pakeanana sing sarua hideung, sedeng nu disebut pakean mangsa harita... ukur mangrupa libetan-lebatan kaen, mungkus sakujur badana.
Nu narik perhatian manehna, tetela eta opat urang jalmateh marekel bedog panjang, anu wangun jeung rupana jelas keur tarungan. Tidieu katingali, yen eta opat urang jalmateh mangrupakeun jago-jago tiwalungan talaga atawa nu disebut dunya pasilatan. Malah kadenge hiji diatarana aya nu cumarita, sorana serak bangun eungap siga jalma anu boga panyakit mengi.
Darpan: “Hhhh! Teu sangka elmu pangenteng badanna luar biasa, urang sakabeh nepikeun ka kapalingan gerak...”
Samud: “Silaing tong héran, Darpan. siWidura mémang murid kamemet ki Bundarwastu, tangtu bae sagala-galana weléh dinomer hijikeun...”
Darpan: “Wah... kamemet naon? Mun enya manehna murid kameumeut, mustahil diutus ka cameti galing nu jelas-jelas keur ditimpa prahara hebat...” tempas Darpan anu sorana eungap téa.
Samud: “Ieu ujian, lur.. DiPancaruntah manehna geus taya lawan. Pon kitu deui diwewengkon Sundapura, geus jarang jalma nu mampuh nandingan elmu kanuraganna...”
Darpan: “Waahhh.. Memangna silaing geus kungsi nyaksian manehna Bitotama, Samud?”
Samud: “Nya acan, ngan ceuk beja kitu. Satiap manehna bitotama, teu weleh unggul dinu jadi lawana.”
Darpan: “Hhhh! Ngarana béja can tangtu benerna. Aya paribasa omonganmah leuwih harus batan goong, salawasna teu weleh diaya-aya jeung digegedékeun! Saran ti urang nya yeuh, tong gampang percaya ka nu can katenjo. Sabab bisa wae lohong, ukur neang ngaran...” Ceuk si eungap keukeuh sinis ka jalma anu keur diupatna.
Samud: “Tapi siWidura murid kamemet kiBundarwastu, geus lain jadi rusiah umum Darpan, euy…”
Badri: “Bener…” baturna nu saurang deui anu sirahna butak milu nyambungan. “Malah ceuk selentingan cenah manehna geus dibaktakeun jadi calon tutuwa padepokan Pancaruntah. Padahal umurna moal kurang ti 22 taunan...”
Darpan: “Nya, justru didieu nu jadi akar permasalahannanateh Badri, Samud. Silaing nyaho pangna siWidura nepikeun kadiutus kacameti galing sosoranganan?” ceuk siEngap bari rut-ret katilu urang baturna.
Badri: “Nya apal.. cenah pangna manehna indit sosoranganan kacameti galingteh, alatan kabeulah bencah ku masing-masing pagawean anu teu barisa ditunda-tunda…”
Darpan: “Hahaha...” sieungap atawa Darpan seuri bangun ngécé, “Beja nu sumebar memang kitu, lurr. Tapi perlu dikanyahokeun, pangna siWidura tepikeun kapaburincai jeung batur-baturnateh, sasat hasil pagaweanna dulur sapagurona sorangan nu hayang nyieuhkeun manehna diPancaruntah.”
Samud: “Baruk! Tapi bet asa piraku Darpan, euy. Piraku dulur siWidura aya nu boga hate julig kitu?”
Badri: “Heu-euh.. dikolong langit ieu, saha nu teu apal ka siPanca tunggal? Nu kasohor ku kakompakan jeung Rasa duduluranana. Piraku diantara maranehna aya nusilih pakieuhkeun...” ceuk Badri anu sirahna Butak bangun anu teu percaya.
Darpan: “Silaing duaan tong kabobodo tenjo, euy! Diluarna bae memang kacirina kitu, tapi dijero? Hh! Gorowong siga tangkal dihakan kirinyuh! Dengekeun iyeuh, lamun urang pirajeunan daek nyalusur riwayat padepokan, sakuduna nu diangkat jadi tutuwa padepokanteh nya kiRundayan.. murid kahijina kiBundarwastu. Lain ngabaktakeun siWidura anu kasebutna murid paneungah, nu matak pantes lamun kiwari siWidura aya nu ngakalakeun ku cara diantep sosorangan muru cameti galling anu keur diLanda prahara hebat…”
Samud: “Jadi pamikir maneh kasarnamah siWidurateh diparabkeun, kitu?”
Darpan: “Hm, bener, euy.. memang kitu.”
Samud: “Tapi naha yakin ku cara kitu siWidura baris binasa diCametigaling?”
Darpan: “Kauala yakin pisan, euy.. sabab lamun maraneh apal kanu jadi Rajapatina pasti bakal kaget…”
Samud: “Memangna saha kitu?” ceuk Badri panasaran, pon kitu deui dua urang baturna. …”
Darpan: “SiInjuk kawung, euy...’
Samud: “Saha? siiInjukkawung?’
Gegeger… cacap nyarita kitu, kadenge sora gelap anu ngageleger matak katorekan. Nu opatan kuat karajol rarewaseun, pon kitu deui siLalaki anu nunyumput luhureun Paraseuneu. Meh-mehan manehna oge ngagubrag, mun seg teu kaburu ngerahkeun elmu sirna bobotna. Kakara sanggeeus bumi eureun ngageterna, kadenge Darpan neruskeun deui caritaanana.
Darpan: “Bener euy, siInjukawung…”
Samud: “Tapi ceuk beja siInjukkawung Saumur jeung aki guru urang anu kiwari geus sampurna, piraku aya jalma anu sanggup hirup tepikeun ka sakitu lilana?’
Darpan: “Beja tinggal beja, dongeng-tinggal dongeng, euy. Buktina memang kitu, siInjuk kawung kiwari geus muncul ngadon nyebarkeun Rajapati diCameti galing…”
Samud: “Hmm… lamun eta beja bener ayana, bisa jadi siWidura tamat Riwayatna…”
Darpan: “Bener, sarta tarekahna jalma anu dengki tea.. laksanana kalawan nyugemakeun. Nyatana hasil nyieuhkeun siWidura ti padepokan Pancaruntah…”
Nu tiluan arunggut-unggutan, demi ngadenge kateranganana Darpan sarupa kitu. Pon kitu deui jinisna, anu kiwari keur nyumput luhureun para seuneu tea. Hatena bener-bener kaget demi ngadenge, ucap-ucapannana ieu opat urang jalma. Pangpangnamah ucapanana sieungap, anu nelah kiDarpan.
Lepas antara bener henteuna eta obrolan. Nujelas, caritaan sieungap surup jeung kanyataanana. Kiwari.. dirina nyorangan, nampa tugas tipadepokanana sangkan ngarengsekeun hiji masalah anu keur lumangsung diCameti galling.
Manehna katut dulur-dudulurna paburincay, kabeulah bencah kumasing-masing tugas nu teu barisa ditunda jeung sarua pentingna.***
Masih seger dina ingetannana, kadenge guruna mapagahan kamenehna ku sorot mata anu kuyu bangun anu ngemu kahariwang anu pohara. Dameureun jauh-jauh geus kabade, yen sakali ieumah lawanteh beurat kacida.
Guruna: “Widura, sabenerna bisa bae kami ngabatalkeun ieu tugas. Tapi janji tinggal janji. Jiwa kamanusaan kudu tetep diajegkeun, pangpangna ku pihak urang numemang mampuh pikeun ngalaksanakeunana. Kiwari sakumna rahayat Cameti Galing keur butuh ku pitulung, lamun lain ku urang rek kusaha deui...”
kiWidura: “Guru, saur abdi oge mugya salira masing tenang. Murid tangtos baris ngalaksanakeun ieu tugas kalawan iatna...”
Guruna: “Hhh...! Sakuduna ieu tugas keur Andika limaanen. Tapi Hyang Widhi ngaguratkeun carita sejen...”
Masih dina kaayaan kuyu, guruna ngongkorongkeun hiji liontin lebah beuheungna.
kiWidura: “Ieu... ieu... naon, guru...”
Guruna: “Pake bae, dina hiji waktu ieu liontinteh baris aya gunana...”
kiWidura: “Hatur nuhun, guru...”
Guruna: “Hmm.. tah ayeuna regepkeun, kaula rek mere peupeujeuh...”
kiWidura: “Mangga...”
Guruna: “Teu salawasna bitotama kudu dipungkas ku kaunggulan. Jeung teu salawasna bitotama, kudu dipungkas ku kabinasan! Aya kalana urang kudu mundur jeung aya kalana urang kudu maju. Coba.. naha andika paham, Widura?”
kiWidura: “Pa.. paham, guru.”
Ceuk manehna mangsa harita, bari jeung can rada ngarti. Kiwari sanggeus ngadenge obrolan Badri saparakanca kakara sadar, horeng lawan anu baris disanghareupananateh lain jago sambrangan. Kasebut jago sakti anu geus jarang tandingna.
Bareng jeung hujan nu mimiti raat, manehna geus aya ditempat nu rada anggang ti Badri saparakanca. Malah keur lumampah nyorang jalan satapak anu sakeudeung deui cenah tewreh tepi ka anu dituju.. nyatana kadipaten Cametigaling.
Jauh hanteu burung cunduk, anggang hanteu burung datang. Kira wanci panon poe tunggang gunung, ahirna manehna tepi katapel wates anu dicirian ku dua tumpukan batu bata anu ngapit kenca katuhueun jalan. Eta tumpukan batu bata teh mangrupa gugunungan, anu disatiap puncakna dipsangan hulu buta.
ki Widura: “Lakadalah, gening teu burung nepi…”
Ceuk kiWidura bari jeung ngajanteng hareupeun lawang. Panona melong kajalan gede, anu ngabulungbung muru ka kadipaten. Keur kitu, hiuk… teu puguh-puguh angin ujug-ujug ngaguruh. Kalakay kuat ka rabeng, persis jajalaneun anu rek disorang kumanehna. Aya sagulung hawa aneh anu sumarambah kana bayahna, hate ujug-ujug pating sareblak dibarung ku jajantungna anu ratug tutunggulan.
ki Widura: “Hm.. teu salah. Lamun ieu kadipaten keur dirumrum ku prahara hebat! Buktina tacan naon-naon, hate aing ujug-ujug ting sareblak kieu. Hmmm…”
Ceuk gerentes hate kiWidura, bari mimiti ngalengkahkeun sukuna ngaliwatan eta dua tumpukan batu bata minangka gerbangna. Panona terus larat-leret nitenan kaayan disabudeureunana. Jalan beuki barala, jukut jeung tutuwuhan mani ngagigidig nutupan sabagean jalan padati. Sedeng kaayaan bener-bener sepi, taya jalma anu ngulampreng.
Heuleut sababaraha waktu tiharita, srog.. kiWidura tepi kahiji tempat. Tidinya, aya sabubuhan manuk Rangkong keur ngarubung-rubung welasan bangke, ngan bangke naon kumanehna can kaciri sabab kahalangan ku eta welasan manuk rangkong tea.
Pangangguran sabubuhan manukteh dibaledog. Buriak.. manuk rangkong alias manuk bangke teh ngaburiak bari rame disarada. Teu lila geus tarurun deui, malah tuluy ting galapruk ngahanca hakaneun nu tinggal sautak-saeutik deui.
Lain deui kiWidura ngagebegna, sabab tetela anu keur dirubung-rubung manuk Rangkongteh, welasan layon jalma sarta lamun ningali kana pakeananamah bet siga-siga prajurit karajaan. Ngan prajurit karajaan mana, manehna can sidik dapuguh ukur saliwat.
ki Widura teu wani ngadeukeutan. Sabab sadar, dina layon nu geus sakitu buruknateh, kakandung hiji jaram nu leuwih bahaya tibatan peurah Oray Centong (Sinduk). Leuwihna ti kitu eta jaram bisa nepa, ngaliwatan hawa disabudeureunana.
Ku kituna manehna terus bae nyalingker ka kencaeun jalan, laju ngagedig neruskeun deui lalampahanana.
Langit geus mimiti poek, cahya layung mingkin surem.. sedeng hawa kaambung bau, nandakeun yen disabudeureun eta tempat loba bangke jelema anu teu kapulasara.
Kaayaan karasa geueuman, jalan tetep sepi sok padahal geus deukeut kalawang kori. Malah kaciri garduh jangkung, lapat-lapat dantara medemna cahaya langit.
Ahirna, srog.. kiWidura tepi kalawang kori Cametigaling. Deui-deui manehna ngaranjug, sabab dilebah dinya oge.. aya welasan layon nepikeun kanyocok. Malah teu jauh tidinya, aya bangke munding sarakit kumplit jeung padatina.
Eces ayeunamah katingali, rata-rata layonteh binasa ku pakarang seukeut.. diantara bae aya nu beuheungna meh sapat, nu beuteungna budal-badil, malah aya nu sakujur awakna rungseb karajam peso tengor. kiWidura gogodeg, ngabayangkeun katelengesan jalma anu ngalakukeunana.
kiWidura: “Mhh... tetela kejem jalmateh. Nepi ka tega ngalakukeun hal sarupa kieu? Malah… mh,”
Ceuk kiWidura teu kebat, basa kaciri dintara welasan layonteh aya layon budak sagala rupa. kiWidura jadi mikir, sabab ceuk selentingan najan siInjukkawung kasebut golongan hideung tapi manehna cukup gagah. Teu samodel kajadian anu kiwari keur kaciri hareupeunana.
kiWidura: “Rada aya nu aneh, sakuduna sakur jalma nu jadi korban siInjukkawung ragana bakal mareureut teu bina ti regang nu ngarangas. Tapi gening ieumah bet siga urut tapak pakarang seukeut? Mh, naha enya kitu palakuna siInjukkawung? Atawa aya jalma sejen nu nyaruk ngarana wungkul?”
kiWidura jadi teu beak-beak nyamikir, sedeng tikitu ari panonamah tuluy larat-leret nitenan kaayaan disabudeureunana.
Breh... dihiji tangkal kaciri aya hiji layon. Dadana kapanggang kutumbak parat nepi kana tonggong, sarta teu jauh tidinya aya hiji tulisan ku guratan getih! Ngabaris dina dahan nua aya gigireun eta layon.
Sedeng unina kieu; “Sing saha-saha nu kumawani kabur ninggalkeun ieu kadipaten, dijamin binasa! contona, saperti ieu komplotan!”
Kitu ceuk eta tulisan nu tetela mangrupa hiji ancaman, nu tangtuna bae oge ditujukeun ka sapangeusi Kadipaten Cametigaling sangkan ulah kumawani kaluar ninggalkeun lembur.
Keur larat-leret kitu, “Siut-siut-siuttt.. Gurilap!”
Ngadadak dinubala aya nu ting gurilap, sanajan teu kaciri naon-naona, tapi tina hiukna angin kumanehna geus bisa ka teguh.. naha sabangsa naon nu nyerang kamanehna kiwari. Ku kituna dina gerakan anu kacida tapisna, kiWidura langsung ngagerakeun pigeulang leungeuna kana palebah cangkeng. kiWidura mesat gobangna dina gerakan anu kacida gancangna.
“Siuuttt…” “Trang...! Trang...! Cring, buricak...”
Sababaraha kali kadenge sada nu ting belentrang, disusul ku ting buricakna kembang seuneu disabudeureun eta patempatan. Ukur sajongjongan, serangan demit nu sakitu bahayanateh benang disapu kujurus Gurat Bumi dina Elmu Panurihan.
kiWidura: “Jago silat timana, kaluar! Ulah sumput salindung miyuni hayam kabiri...”
Ceuk kiWidura susumbar bari ngabar bedog, panona terus larat-leret nitenan kaayaan disabudeureunana. Sugan jeung sugan manggih gerakan musuh, boh kelemengna boh juringkangna. Tapi tetela.. musuh bener-bener apik, buktina meh saban tempat diteang teu aya gerakan naon-naon, ari lain ukur ting kulupurna dangdaunan anu katebak angina.
Sanggeus nu ditangtangna taya tembong kaluar, lalaunan sukuna ngalengkah ngadeukeutan balati nu balatak teu jauh timanehna. Diantara welasan balatiteh, aya hiji peso nu perahna dibulen kulawon bodas. Manehna ngaduga, eta lawon mangrupa pesen tinu jadi musuhna.
Da jeung enyana, sanggeus eta lawon dibébérkeun tetela eta lawonteh mangrupa pamepeling sakaligus ancaman tinu jadi musuhna. Sedeng unina, kieu; “Saha bae Andika tinggalkeun ieu patempatan! Kajaba hayang sanasib jeung Prajurit Sunda nu aya ditapel wates kadipaten. Kaula siInjukkawung..”
kiWidura ngagebeg, demi apal ka welasan layon anu tadi dirubung-rubung tea ku manuk Rangkong. Malah bari jeung angeur waspada, manehna ngagerentes kieu,
kiWidura: “Hm, jadi tetela.. welasan layon anu tadi binasa ditapel watesteh para prajurit Sunda. Hmm... tapi aing teu percaya upama Andika siInjukkawung! Heup.....”
Ngadadak awakna ajleng-ajlengan, nyingkahan welasan layon nu nyocok dilawang kori. Ukur sajorelat, sukuna geus nangtung luhureun garduh jangkung nu aya kenca katuhueun lawing kori. Panona terus larat-leret, sedeng bedog geus disarungkeun deui teu kanyahoan kumaha carana ngasupkeunana.
Deui-deui elmu harewos tongona dipetakeun, rupa-rupa sora kontan kadenge.. timimiti sora sato leutik, tug nepi ka sora sato gede. Nepikeun ka ahirna, ngadadak bae kadenge sora lengkah suku anu keketeyepan dipalebah hiji pipir imah.
Ku kituna ngan jleng bae manehna luncat, diluhur garduh anu sakitu luhurna. Basa sukuna nincak lemah langsung ngeper deui, sarta ngajorelat muru kapalebah sora anu di duga gerakan hiji jalma.
siTaregos Hideung: “Eeh…”
Kadenge siJalmateh ngagero lirih, dumeh teu nyangka gerakanana bisa kapanggih. Ku kituna, ngan belesat bae manehna lumpat ninggalkeun panyumputanana.
kiWidura: “Montong kabur kisilah, dagoan kaula... heup!” ceuk kiWidura bari saterusna lumpat ngabelesat, ngudag musuhna nu jejerih ninggalkeun pakalangan.
Bieu, sanajan ukur saliwat kaciri musuhna ditaregos warna hideung. Sarta ngagantungkeun bedog panjang lebah tonggongna, kiwari musuhna geus ngiles deui kahalangan ku pengkolan jalan.
Jleng-jleng-jleng… kusababaraha kali ajleng-ajlengan, manehna geus hasil nenjo musuhna. Nu terus meleteng muru kajero kadipaten.
Breh, ebreh.. musuhna memang ngagandong bedog panjang. Gerakana estuning kesit, nepikeun ka sakitu jauhna manehna tacan sanggup nyusul sumawona ngadeukeutan. Eta ukur nuduhkeun, yen siTaregos hideungteh mibanda wewesen anu teu benang dianggap enteng.
Kakara sanggeus silih udag cukup lila, kiWidura hasil ngadeukeutan nu jadi musuhna. Jarakna meh dua tumbakan, manehna yakin asal satumbak jarakna Ajian Tapak Genina, baris mampuh kena kana sasaran.
Tapi.. teu kira-kira kiWidura ngagebegna, basa siTaregos hideung ngadadak malik bari ngebutkeun tungtung jubahna.
“Buurisattt...” lir hujan girimis, deui-deui peso tengor langsung rabeng mapag awak kiWidura nu keur kumalayang dina lemah.
kiWidura: “Kurang ajar, Hiaahhhh…!”
kiWidura nu memang geus nyiapkeun jurus Tapak Genina langsung ngagorowok, bari metakeun eta ajian. Sarangkum hawa panas langsung ngagelebug, mapag welasan peso tenggor.
“Hiukk…” “Duaarr... Blegh!”
Kadenge sora nu ngabeledug pasusul-susul. Dorongan kahiji ngancurkeun welasan peso demit nepi ka jadi silalatu, dorongan kadua numbuk dada lawan ku samberan angina mungkul.
Siwawalun: “Hukhhh...”
Kadenge SiWawalun ngaheruk, awakna tepikeun ngangabelesat katukang, terus nabrak pager benteng kuta tepikeun ka burakrakan. Bross... nobros pager kai. Kebat kajero nepikeun ka jepna jempe taya nu kadenge.
Sedeng kiWidura sorangan awakna tepikeun kajujumpalikan katukang, teu bisa lepas tina mamalana. Dada karasa eungap, ambekan sesek, malah aya sagulung hawa haneut nyurungkuy kaluhur. Untung manehna kaburu ngatur napas, ngalantarankeun eta hawa nu bau tur hanyirteh teu nepi ka kaluar kautahkeun. Tidieu kumanehna bisa kaukur, yen kakuatan lawan memang lain bantrak-bantrakeuneun.
Celegedeg! Manehna nangtung dinu rada anggang. Pikeun sakedapan manehna can mampuh naon-naon. Kakara sanggeus dadana longsong jeung ambekanana normal, kalawan pinuh ku kawaspadaan manehna mimiti mariksa kaayaan siWawalun, nu tadi macleng nobros pager kai tea. Manehna yakin kiwari siWawalun keur ngagoler dina kaayaan dadana anu tutung. Ceuk tadi ge tong boroning awak manusa, dalah batu cadas oge baris beulah mun ka timpug ku ieu ajian.
Tapi bet matak kaget, siwawalun raib teuing kamendi. Nukatenjo ukur rebahna kekembangan nu buyatak pinuh ku getih seger matak ketir. Pikeun sakedapan manehna jadi ngahuleng, neguh-neguh nu geus tumiba kamusuhna.
kiWidura: “Aneh... naha kamana cenah siWowolekteh? Maoal kitu aya nu nyumputkeunmah? Hm, bisa jadi! Sabab mustahil aya jalma nu sanggup lolos tina maut, mun kabeunangan ku Tapak geni aing…”
Kitu ceuk gerentesna bari anger waspada. Panona tuluy larat-leret, nepikeun ka ahirna bentrok paneuteup jeung hiji wawangunan anu gede kacida. Manehna kontan ngagebeg, sabab sadar yen eta wawangunan badagteh tangtu karaton Cametigaling.
Ngan nya kitu, sanajan eta wawangunan agréng tur badag, tapi tetep kaayananamah sepi taya jalma saurang-urang acan.
“Blig! Blig! Blig.. manehna ngahaja leumpang di beratkeun, sorana pating gareblig nepikeun ka ngandung aweuhan. Nu dipalar aya jalma nu kapancing kaluar, tapi geus kasakitu sajauhna anger taya jalma saurang-urang acan.
kiWidura: “Sampura, sun...”
Kadenge manehna uluk salam sugan aya jalma anu nembalan. Tapi sanggeus rada lila tetep jempling, taya anu nembalan.
kiWidura: “Sampura, sun...”
Pikeun kadua kalina, manehna uluk salam malah ayeunamah leuwih bedas tibatan tadi. Tapi anger dijero taya nu nembalan ukur aweuhanana bulak-balik siga nu ngalelewean.
Nya dina kaayaan kitu, dak dumadak manehna ngagero disusul ku awakna anu ngadadak ngajaul kaluhur. Sababaraha sinar katembong ting belesat, ngaliwat handapeunana.
“Paralakk…” deui-deui aya pakarang demit langsung naranceb kana tembok benteng, persis tukangeun manehna tadi nangtung. Eta pakarang mangrupa puluhan paser naranceb nepi satarengahna.
“Jorelat... kalayang!”
Lir nu hiber awakna terus ngalayang, srta ngajorelat muru hiji rungkun kembang. Sedeng ramo-ramo leungeuna geus ramakah, rek ngaranggem babatok jalma ku jurus Cakar Rajawali Sakti.
Jalma: “E-ehh...”
siJalma katembong kaget, gentak nangtung bari nyamberkeun bedogna rek dipake mapas. Tapi plos... kusakali muterkeun pigeulang leungeun, bedogna poos ngakan angin. Malah samemeh sadar pigeulang leungeuna beunang dicerek laju dipurilitkeun.
Jalma: “A.. aduhhh...”
Sijalma kaget campur jeung nyeri, kapaksa awakna milu muih mun teu hayang leungeuna rampal kapurilitkeun. Buk! Kana bujurna aya nu ngadupak, kontan bae awakna tiJongjolong terus ngagedebut nangkuban. Sedeng bedogna geus pindah leungeun karebut ku kiWudra.
“Bener-bener hade kalakuanteh, Kisilah! Saha anjeun nusabenerna?”
Ceuk kiWidura bari jeung ngalengkah ngadeukeutan. Bedog rampasanana ditudingkeun, kapalebah jalma nu masih ugal-ugil arek hudang. Tapi samemeh, eta jalma ngajawab.. ngadadak bae tukangeun archa butha aya dua jirim nu ting garajleng megat jajalanen. Malah seak... seaakkk... teu kungsi cacarita heula, duanana langsung narajang kalawan angas. Masing-masing bedogna pating hariuk, ngarah badan kiWidura ti dua jurusan.
kiWidura: “Hhh! Kutan kieu urang Cameti galing nyambut tamu? Haiitt...” walon kiWidura bari jeung ngagulak-gileukeun awakna kakenca jeung kakatuhu. Ditungtungan, kumundur salengkah katukang nyingkahan seuseukeut bedog nu liwat sesentian dina rarayna.
Atuh plos-plos-plos! dua serangan bedog kontan plus-plos ngakan angin, tapi nu duaan kesit.. sabab ebreh, bedogna teu eureun tuluy ting hariuk deui ayeunamah leuwih garang batan tadi. Eta bae, kadenge sorana pating hariung, dibarung ku kilatan cahaya anu mantul tina seuseukeut bedog.
Menang sababaraha rintakanmah, kiWidura ukur gulak-gileuk miceun panarajang dua urang musuhna. Anu tetela, sanajan saliwat kumanehna bisa kaukur nepi kamana boh tina elmu pangenteng badan pon kitu deui tanaga lapisananana. Anu lain sing sombong, manehna masih unggul sababaraha tingkat tibatan nu jadi lawan-lawana.
Sok komo sanajan masih ngora, kapanan manehnateh beunang kasebut murid kamemet kiBundar wastu. Anu geus hamper 90 persen ngawaris elmu bedog Pancaruntah kaasup elmu Gurat bumi dina elmu panurihan.
Ku kituna, nalika aya bedog ngaliwat luhureunana, sakilat manehna ngaguratkeun bedog rampasanana, nu diarah dada lawan. Sanajan ukur guratan, tapi lamun keuna geus bisa dipastikeun kulit dada lawan bakal beulah dewang.
siJalma sorangan katembong kaget, rikat manehna jingkrak tapi teu sadar gigir bedog rampasan justru nyabok pigeulang leungeuna.
Plak! “Aduh…” siJalma ngagero, bedogna langsung lepas. Sedeng kiWidura laju ngagorentelkeun awakna di udara, nyingkahan sabetan bedog anu ngarah cangkeng.
Plak! Deui-deui kadenge sada nu ngageplak, basa jalma nu kadua sikuna beunang di cabok ku gigir bedog, najan kitu masih jauh dina bahaya.
Pamungkas kiWidura nutup gerakan jurusna kujalan mapas ikeut lawan nepi ka lalesotanana. Najan kitu, teu nepi ka motong buuk sumawona nyilakakeun sirah lawan-lawana.
“Prok-prok-prok..” ngadadak bae, kadenge sada anu kekeprok sababaraha kali. Disusul ku norojolna hiji jalma nu buukna geus cetuk dawuk. Awakna jangkung kuru, tapi katembong keker.. malah kaciri urat leungeuna ting raringkel, tanda manehna mibanda tanaga lapisan nu kacida hebatna.
kiJantaka: “Hebat! Hebat! Bener-bener jurus bedog nu kacida hebatna. Kaula bener-bener salut! Naha andika urang Sanggabuana?” Pikeun sakedapan ki Widura melong heula eta jalma, teu lila sungkem bari pokna.
kiWidura: “Leres, nun. Sim kuring ti sanggabuana. Upami dipercanten, wasta simkuring Widura...”
kiJantaka: “Hahaha! Naha Andika nu nelah siRajabedog Sarebupati? Salah saurang tilima sadulur nu disebut siPanca Tunggal?”
kiWidura: “Sadaya-daya, nun. Mung jujuluk siRajabedog Sarebupati, eta sebatan kaom golongan nu diageung-ageung. Sim kuring teu wararantun nganggona...”
kiJantaka: “Andika teu perlu ngasor sarupa kitu, Widura. Najan kumaha kahebatan andika geus kasaksi, jujuluk siRajabedog Sarebupati memang teu kosong...”
kiWidura: “Hatur nuhun atas pamujina, kai...”
kiJantaka: “Najan dikukumaha, ku hadirna Andika ka ieu patempatan pikeun kaula saparaknca geus ngarasa bungah. Anu sugan jeung sugan bae, pepedut nu salila ieu gumulung diCametigaling bisa disuaykeun kalawan nyata...”
kiWidura: “Hatur nuhun, sun. Neda piduana bae...”
kiJantaka: “Hmm... pasti! Pasti ku kaula didungakeun, Widura. Tapi... kamarana batur Andika nusejena?”
kiWidura: “Awon nu kapihatur, sun. Dulur-dulur sim kuring sadayana, nuju kapapancenan ditempat anu sanes. Jadi pangapunten anu dungkapteh mung abdi nyalira, mugya bae teu ngajantenkeun renggat panggalih...”
kiJantaka: “Ih.. atuh nya tangtu bae henteu, Widura. Malah sabalikna kaula saparakanca nu kudu menta dihampuramah, sabab lain ngabageakeun tamu sakumaha mistina.. ieumah bet kalah hayoh diserang ngababi-buta. Jadi.. sakali deui nu kudu menta dihampuramah nya kaula saparakanca..”
kiWidura: “Urang pada-pada silih lubarkeun bae, nun. Mugya ieu kasalah pahaman teh sing aya mangpaatna. Nu penting ayeuna, diantara urang tos teu geuneuk teu maleukmek, balungbang timur jalan gede sasapuan...”
kiJantaka: “Ha,ha,ha... bener-bener. Enya kudu kitu, Widura. Tetela sikep anjeun bener-bener gagah, teu sempit jeung teu heureut pangdeuleu…”
kiWidura: “Hatur nuhun sun, atas sagala pamujina. Tapi naha kengeng sim kuring apal kasalira katut nu sanensna?”
kiJantaka: “Hmm…” siCetuk Dawuk manggut-manggut, geus kitu pok nembal kana pananyana kiWidura. “Ngaran kaula, Jantaka. Eta nu bieu ku andika dirubuhkeun sanyatana para senapati Cametigaling. Lamun andika percaya, kaula pamimpina ieu Para senapati...” ceuk siCetuk Dawuk, bari ngabagikeun paneuteupna ka nu tiluan nu masih ting puringis.
kiWidura: “Hatur nuhun tos diwanohkeun...”
kiJantaka: “Hmm.. Pada-pada, Widura..” ceuk siCetuk dawuk, nu nelah kiJantaka.
kiWidura: “Mangga masrahkeun ieu bedog, sarta pangapunten tos kumawantun...”
kiJantaka: “Teu jadi masalah Widura, teu jadi masalah. Malah kaula nganuhunkeun, dumeh Andika teu nibankeun leungeun jahat ka parasenapati kaula…”
kiWidura: “Teu wararantun, sun…”
kiJantaka nampanan bedog rampasan, malah harita keneh langsung dipasrahkeun ka kiRisang jalma nu tadi pangheula dirubuhkeun ku kiWidura.
kiJantaka: “Tah ayeuna, hayu... urang ngadeuheus ka Gusti Adipati. Margi tos lami, inyana nunggu-nunggu urang Sanggabuana...”
kiWidura: “Oh.. mangga. Sareng hatur nuhun...”
kiJantaka: “Sugri, tuluykeun tugas andika. Sarta tetep masing iyatna, bisi musuh datang teu pupuguh…”
Sugri: “Unjuk sumangga, kai…”
Walon kiSugri bari unggeuk, sedeng kaciri ari raraynamah masih keneh sarepa. Sabab najan kumaha, maranehna tiluan masih keneh can percaya lamun ukur sageprakan bisa dilagrakeun ku budak anu umurna paling banter 22 taunan.
kiJantaka: “Widura, hayu...”
kiWidura: “Mangga tipayun...”
Ceuk kiWidura rengkuh, tuluy sungkem kanu araya didinya. Geus kitu bral... duanana laleumpang ninggalkeun pakarangan karaton. Sedeng tilu senapati tuluy ting kelemet, asup ka masing-masing panyumputanana deui.
Geus kitu bral... duanana miang ninggalkeun pakarangan karaton. Saterusna kiWidura dibawa kahiji jalan rusiah, anu mana eta jalanteh muru tempat pangungsiana juragan Adipatisura saparakanca. Eta jalan marungpa torowongan panjang anu bulak-belok jeung loba anu nyagak, mun teu apalmah matak nyasab kabalason.
kiWidura: “Janten urang cametigalingteh teu carem sadayana, kai?” kadenge kiWidura mimiti tumanya.
kiJantaka: “Hmm... nya tangtu wae henteu, Widura. Ngan nyakitu, sawareh hasil diungsikeun sawareh deui loba anu binasa...”
kiWidura: “Tadi dipalebah lawang kori, abdi ningal welasan layon balatak. Diantarana aya murangkalih sagala rupa, naha aranjeunateh warga Cametigaling nurek ngarungsi?”
kiJantaka: “Eta memang bener widura, maranehnateh warga Cametigaling nu teu tahan ku kalaparan sarta rerencepan kaluar bari tanpa karana idin. Tapi tibatan hasil, kalah tinemu jeung ajalna...”
kiWidura: “Musuh bener-bener telenges, kai. Tapi palebah dieu aya nu rada teu kahartos...”
kiJantaka: “Teu kaharti kumaha, Widura?”
kiWidura: “Saur selentingan, nu kiwari jadi banaspatiteh cenah siInjukkawung. Nu satiap korbana bakal meureut teu beda ti regang garing...”
kiJantaka: “Hmm... enya, terus?”
kiWidura: “Tapi abdi ningal para korbanteh rata-rata binasa ku kapakarang seukeut! Malih sababaraha urang diantarana, aya nu warugana karancang jadi korban welasan Peso tengor. Cobi digalih, naha ieu teu matak nyurigakeun?”
kiJantaka: “Hmm...” ki Jantaka unggut-unggutan, “Naha Andika ragu, lamun musuh nu keur ngagalaksakteh lain siInjukkawung?” kiWidura unggeuk tanda ngaenyakeun.
kiJantaka: “Sabenerna.. kaula katut juragan Adipatisura kungsi baroga pikiran nu sarupa kitu. Tapi terus terang bae, samemeh uru-ara lumangsung.. saurang jagabaya gusti adipati, aya nu perlaya dina kaayaan meureut! Nya persis saperti nu bieu ku Andika disebutkeun...”
kiWidura: “Baruk! Gening kungsi aya kajadian kitu?” kiWidura ngagebeg.
kiJantaka: “Bener. Layona dianterkeun ku para Puragabaya pangawalan barang. Sanajan jasadna geus teu mangrupa. Tapi nilik ciri jeung tanda-tandana, eta jasadteh memang kiRawun...”
kiWidura: “KiRawun.. saha etateh, kai?”
kiJantaka: “Manehnateh papatih kahiji juragan adipatisura...”
kiWidura: “Kutan kitu...?”
Samemeh ki Jantaka nyarita deui, maranehna tepi manten kahiji tempat. Nu matak kaget, didinya loba jalma nu keur ngariung. Awewe, lalaki, kolot, budak ngariung dieta rohangan. Bari kaciri masing-masing warugana kuru, baregang tanda kurang barang dahar.
#Hanca
kiWidura: “Kai saha maranehnateh?”
kiJantaka: “Nya ieu pisan warga Cametigaling nu hasil disalametkeunteh, Widura…”
kiWidura: “Tos sabaraha lami, arayana didieuteh, kai?”
siPanjaga: “Lamun teu salah geus hamper genep bulan leuwih, Widura...”
kiWidura: “Baruk! Geningan tos cukup lami?” kiWidura ngajenghok.
siPanjaga: “Bener. Sanajan maranehna bisa lolos dina leungeuna siInjukkawung. Tapi maut nu leuwih nyata tuluy ngukuntit, nyatana mangrupa panyakit jeung kalaparan...”
kiWidura unggut-unggutan bari terus rarat-reret nitenan kaayaan disabudeureun eta rohangan. Jep, kaayaan ngadadak jempe basa manehna mimiti ngaliwat kanu ngarariung. Karasa aya puluhan pasang panon neuteup kamanehna, tetepan anu pinuh ka tunggaraan jeung kasangsaraan.
Aya parasaan perih nu nyerését kana hatena, ngabesét leuwih hebat batan seuseukeut baraja sorangan. Nimbulkeun hiji hawa panas ngagolak jeroeun dadana, hiji geduran amarah jeung dengdem kanu geus ngabalukarkeun rayat Cametigaling katalangsara.
Teu kungsi lila duanana geus tarepi deui ka hiji rohangan nu cukup gedé. kiWidura ditinggalkeun sorangan, ari kiJantaka ngaleos.. cenah rek mere laporan ka kanjeng senapati. Pikeun sakedapan, kiWidura ukur larat-leret nitenan kaayaan eta rohangan. Legana eta rohanganteh aya kana opat tumbakanana, dicaangan kurupa-rupa palita nu naraplok dina tembok-tembok guha.
Geus kesel nungguan, guratak kiJantaka datang hanjakal nyorangan, sabab kanjeng adipati nuju aya urusan anu kacida pentingna.
kiWidura: “Jadi iraha kaula bisa tepung, kai?”
kiJantaka: “Paling isuk, Widura. Ongkoh ayeunamah geus peuting, mung bae inyana miwarang sangkan ajeun leureuh heula…”
kiWidura: “Kitu nya teu nanaon, atuh…”
kiJantaka: “Ayeunamah hayu, tuturkeun kaula…”
kiWidura ukur unggeuk, saterusna manehna dibawa kahiji kamar teu jauh ti pangungsian. Sanggeus kiJantaka pamitan, gek.. manehna diuk dina dipan, terus ngahuleng mirage meneng. Sakali-kalieun, kadenge sora jalma nu muharurung atawa nu hog-hag parasea dukating marebutkeun naon.***
Isukna sanggeus manehna dibere sarapan, kakara manehna diangkir ku juragan Adipatisura. Dianterkeun ku Catrik, ahirna manehna anjog katempat kamari basa jeung kiJAntaka tea.
Ari anu disebut juragan Adipatiteh tetela, umurna geus tengah tuwuh. Salirana rada bayuhyuh, calik dina korsi kulit tutul.. diapit ku hiji aki-aki nu dedeg pangadegna Jangkung kuru. Nu matak ngajenghok, ku sorot panona anu moncorong lir mata meong. Manehna apal, nu matana kawas kitu mibanda tanaga lapisan nu geus tepi ka tahapan Whiguna (Puncak Kakuatan Manusa).
kiWidura: “Haturan gusti Adipati, nyanggakeun sembah pangabaktos, nun...”
Adipatisura: “Hmm... teu kudu gugon tuhon palaturan karaton, Widura. Da ieumah ukur dijero guha…”
kiWidura: “Teu wararantun, sun…”
Adipatisura: “Hmm, sok kinyah, diuk didinya...” saur juragan Adipati, bari nunjuk salu nu aya hareupeunana. Sedeng didinya kasampak tilu urang jalma, anu matak kaget tetela maranehnateh anu kamari hasil dirubuhkeun hareupeun karaton.. tayalian kiSugri saparakanca.
Adipatisura: “Tah eta nu tiluanteh, parasenapati Cameti galing. Sok kinyah silih wanohkeun…”
kiWidura: “Hatur nuhun…” ceuk kiWidura bari sungkem, siga euweuh kajadian naon-naon samemehna.. ngajaga sangkan ieu tilu senapatiteh teu ngarasa kaleungitan wibawa payunen sang Adipati.
Nu tiluan tembong males sungkem, bari kaciri rada bareureum teuing era teuing panas ku sikep ieu jajaka. Sanggeusna kiWidura diuk, gigireun nu tiluan kadangu Sang Adipati cumarios deui.
Adipatisura: “Tah, ieu anu calik gigireun kaula kiPatih Darbaseta. Sebut bae anjeuna aki patih, da kaula oge teu weleh nga akikeun. Sabalikna, anjeuna ngaalokeun ka kaula. Tapi panca kakimah teu kudu jadi permasalahan, Widura…”
kiWidura: “Unjuk sumangga gusti adipati, abdi ngiringan. Aki Patih, haturan wilujeng tepang.. nyanggakeun salam pangabaktos ti Abdi…”
Aki patih katembong unggut-unggutan, aya nu aneh.. sorot panon anu tadina moncorongteh ngadadak sayu. Tapi kitunateh ukur sakedapan, kaditu geus ngagebur deui malah kadenge inyana cacarita.
Akipatih: “Hmm, ditarima Widura. Sukur Andika geus datang ka ieu kadipaten…”
kiWidura: “Hatur nuhun, pini sepuh…”
Akipatih: “Tapi… naha Andika bet datang sosoranganan? Mana batur andika anu sejena?” Ceuk Akipatih kitunateh bari neuteup seukeut ka kiWidura.
Adipatisura: “Bener Widura, kamana dulur-dulur Andika nusejena? Mana siPanca Tunggal anu kasohor ku kakompakananateh?” sang Adipati ngiring mairan, kana pananyana aki Patih.
kiWidura: “Numawi… awon nukapihatur, sun. Opat dulur abdi sadayana, bet teu kuhanteu kengeng pancen gawe anu teu tiasa ditunda-tunda. Dina lelesan dieu, ki guru kuanjeun saleresna teu ngaraos manah. Nanging kumargi teu aya pilihan, kapaksa anjeuna ngirimkeun sim kuring sosoranganan. Mugya.. salira ngama’fumna bae, sun...”
Adipatisura: “Hmm... Kaula ngama’lum, Widura. Kaula nga ma'lum. Tapiii... masalahna, musuh sakali ieu sajaba tilicik teh tangoh luar biasa. Tapi.. hampura! Lain kaula boga niat ngaremehkeun, tapi samata-mata kaula nyegah sangkan korban jiwa teu terus nambahan. Sabab perlu dikanyahokeun! Geus loba jago-jago bayaran kaula nu binasa diieu kadipaten. Sakali deui hampura, mugya andika teu nepi kasinggung...”
kiWidura: “Teu sawios-wios, juragan. Abdimah moal kasunggang atanapi kasinggung, malih bingah bae nuaya.. eta nawiskeun yen salira mibanda jiwa anu jembar tur manah anu luhung. Nanging... kanggo urang Sanggabuana, perlaya dina hiji tarungan tos mangrupikeun hiji kasampurnaan minangka jawara nu sajati!”
Adipatisura: “Hm.. bener ceuk kolot, uyahmah moal nepikeun katees kaluhur. Tutul moal ngalahirkeun anak ucing. Terus terang bae kaula salut, ku tekad jeung paniatan Andika...”
kiWidura: “Hatur nuhun, juragan. Hatur nuhun...”
Adipatisura: “Tah.. pikeun saheulaanan, Andika cukup ku ngabandungan bae. Sabab kabeneran.. kaulateh rek ngayakeun gempungan, ngabadamikeun kaayaan nu mangkin werit bae...”
kiWidura: “Unjuk sumangga nun, sadaya-daya...” Ceuk kiWidura, ditungtungan ku sungkem.
Saterusna juragan Adipati jeung nu sejena mimiti ngayakleun gempungan, anu mana cenah dina eta gempunganteh ngadadarkeun ngenaan kasadiaan pangan anu geus saeutik deui.
Sarta ngabahas urang karajaan Sunda anu dipentaan tulung, sangkan ngirimkeun pasukan ngabantu kadipaten cameti galing. Anu cenah nepi kadenget harita, tacan keneh ngurunyung datang. Anu sok padahal korban jiwa geus kacida lobana, sarta kiwari bahaya kalaparan geus nyantong hareupeunana. Puguh kasadiaan pangan tinggal saeutik deui.
Keur kitu, cong.. ngadadak ki Widura sungkem.
Adipatisura: “Aya naon Widura...?”
kiWidura: “Nalika sim kuring anjog ka Cametigaling, abdi diserang ku saurang jalma anu ditaregos. Manehna ngagunakewun peso tengor, hiji diantarana pesoteh anu nu perahna dibulen lawon bodas. Sedeng eta lawonteh mangrupa ancaman kasing saha-saha anu kumawani ngilu campur kana urusan dicameti galling. Tah ieu gera, kaleresan lawona kuabdi dicandak.…” ceuk kiWidura, ditungtungan ngasongkeun lawon bodas ka juragan Adipatisura.
Harita keneh, eta lawon ditampanan laju diaos sajeroning batina. Cacap ngaos eta tulisan, sang Adipati gogodeg dibarung ku rarayna anu ngadadak sepa. Ningal kitu nuaraya didinya, heran atuh teras ngiring maos eta tulisan ka asup aki patih katut tilu urang senapatina.
Adipatisura: “Jadi pasukan Sunda anu salila ieu diarep-arepteh geus barinasa gening, Aki Patih….”
Kadangu sang Adipati ngagerendeng, siga anu ditujukeun kadirina pribadi. Ari anu di ajak nyaritana, nyatana aki Patih Darbaseta ngadadak neuteup seukeut ka kiWidura.
Akipatih: “Terus kumaha carana, Andika bisa lolos, Widura?”
kiWidura: “Abdi tiasa ngungkulanana, aki patih. Malih ku etangan kiwari, sijurujanateh tos sah tialam dunya…”
Akipatih: “Binasa maksud anjeun?”
kiWidura: “Leres, mung sawaktos jasadna diteang teu kapendak…”
Akipatih: “Moalmah manehna hasil ngaloloskeun diri?”
kiWidura: “Kuetangan moal, aki patih. Abdi yakin, manehna pasti binasa. Mung bae, layona pasti aya nu nyumputkeun…”
Akipatih: “Hmm…” kiPatih Darbaseta ngaheneng bari unggut-unggutan.
Adipatisura: “Aki patih, kumaha mun geus kieu? Geningan pasukan anu diarep-arep bisa nulunganteh malah gugur samemeh cunduk katengah-tengah medan laga…”
Akipatih: “Ieu warta masih can bukti saratus persena, adipati. Najan kumaha, urang kudu ngabuktikeunana kucara neang katapel wates kadipaten pikeun …”
Adipatisura: “Hmm… bener oge, aki patih.” Saur sang adipati, ditungtungan ku ngaleret ka tilu senapatina, “Senapati, wayahna ayeuna keneh andika tiluan miang katapel wates. Pariksa welasan layon anu barinasa tea…”
kiSugri: “Rangpung dawuh tutas pangandika, sun. unjuk sumangga…”
Adipatisura: “Ajak sababaraha prajurit, keur batur anjeun disatengahing perjalanan…”
kiSugri: “Unjuk sumangga, sun…”
Adipatisura: “Nam kaituh…” saur sang Adipati satengah anu ngajurungan.
Cedok, nu tiluan nyembah.. atuh geus kitumah nutiluan undur ti payunen sang adipati. Laju miang katapel wates, seja ngabuktikeun ancaman siTaregos hideung anu ditulis dinalawon bodas tea.**
#Hanca
Bagean ka 4
Saditinggalkeuna ku kiSugri saparakanca, pikeun sakedapan Sang Adipati sura jeung kiWidura taya nucacarita. Maranehna ukur ting haluleung kabawa ku masing-masing sawanganana, ukur aki patih sigana anu rada anehteh. Sababaraha kali panona maling leret ka kiWidura, bangun anu hayang sidik kana dedeg pangadeg jeung keureutan beungeut eta jajaka wedalan gunung Sanggabuana. Anu tangtu bae, ieu kaayaanteh karasaeun ku Kiwidura atuh daek teu daek manehna jadi rada samar polah.
Kusabab kitu, ahirna kadenge kiWidura mimiti cumarita pikeun meupeuskeun kaayaan anu karasana mimiti aneh.
“Eu pangapunten, juragan, abdi bade aya taroskeuneun…”
“Rek naroskeun naon, Widura…”
“Perkawis siinjuk kawung…”
“Memangna kumaha?”
“Naha salira teu curiga, upama ieu kaayaanteh ukur pagawean sakomplotan jalma anu ngamangpaatkeun ieu situasi? Margi, beja anu sumebar estu patukang tonggong sareng kanyataanana…”
“Perkara eta, sabenerna geus kungsi dibahas Widura. Tapi bukti jeung latar kasangtukangna memang kitu, rajapati diCameti dimimitian ku tiwasna patih kuring anu warugama meureut persis kakenaan ku Ajian Tunggul Bumi milikna siInjukkawung…”
“Nu matak teu kahartos, kunaon manehna bet teras meupeus keuyang? Saleresna naon kahayangna eta kolot? Margi jelas, kapanan dengdemna parantos kabales…”
“Tah ieu anu jadi kapusing kaula saparakanca ge ge widura, sabab taya anu bisa ngajawab kajaba timaranehna sorangan…”
“Abdi gaduh usul, gusti. Nanging punten sateuacana, sanes hayam mapatahan ngojay kameri…”
“Teu nanaon Widura, tapi rek usul naon?”
“Kumaha mun urang nyebarkeun tulisan disababaraha tempat, anu dipalar sugan jeung sugan manehna daek ngajawab…”
“Hm.. usul hade Widura, kunaon samemehna teu kapikir ku kaula? Aki patih kumaha kira-kirana, naha satuju?”
“Eta usul taya rugina, ku Andika bisa dilaksanakeun Alo Prabu…”
Katembong raray juragan Adipatisura, rada cahayaan, bangun anu pinuh ku panghareupan. Sabalikna, kiWidura beuki ngarasa heran ku sikep aki PAtih anu tiatadi teu weleh merhatikeun ka dirina. Nu matk ngan pok bae, ahirna kiWidura ngedalkeun kaherana ka Akipatih.
“Pangapunten sepuh, kumawantun…” pokna, bari sakali ieumah ditungtungan ku sungkem ka aki patih.
“Hmm… aya naon?”
“Tiatadi salira teu weleh merhatoskeun abdi, naha aya naon, sun?”
“Eu… eu… Te-terus terang bae kaula panasaran kanu kalung Andika. Upama meunang nyaho, timana andika menang eta kalung leontin hejo, Widura?”
“Oh iyeu, iyeuteh pamaparinan ti kiGuru Bundarwastu…”
“Naha menang kaula ngilikan?”
“Oh, tangtos bae sun…”
Sanajan teu ngarti, kiWidura teu burung ngalaan kalung dina beuheungna, laju diasongkeun ka eta papatih Nagri Cametigaling. Dibarengan ku leungeun anu ngageter aneh, eta kolot anu umurna geus 60 taunan teh nampanan kalung berbentuk liontin tea.
Boh kiWidura, pon kitu deui sang Adipati. Ngarasa heran ku polahna eta kolot, tapi duanana teu loba omong angur ningalikeun aki patih anu kalawan taliti ningalian eta liontin.
“Anjeun nyaho kana silsilah ieu liontin, Widura?”
“Henteu, margi kiGuru teu sempet nerangkeun. Mung bae inyana amanat, sangkan ngajaga ieu kalung lir ibarat ngajaga nyawa abdi nyalira…”
“Hmmm…”
Deui-deui sirah akipatih unggut-unggutan. Disajeroning ngilikan eta kalung, ebreh biwirna ngageter semu anu ngunyem caritaan anu ngan ukur kadenge ku dirina sorangan.
Sanggeus seubeuh ngilikan eta kalung, kadenge aki patih nyarita bari masrahkeun deui eta kalung ka kiWidura. Saleretan aya nu ting borelak, dina juru-juru panona anu geus kariput, mungguh matak hemeng anu nyaksian.
“Bener ceuk guru Andika, Widura. Ieu kalung kudu dijaga kalawan iyatna…”
“Memangna aya nu aneh eta kalung liontinteh, aki Patih?”
Kadangu kanjeng Adipati tumanya, bari neuteup seukeut kapapatihna bangun anu pinuh ku silidik.
“Ah henteu oge, Alo prabu. Ngan bae, eta kalungteh ngingetkeun kaula keur mangsa-mangsa anu geus kaliwat…”
“Naha aki patih inget ka Putra, anu tos lami ngantunkeun?” saur sang adipati pinuh ku silidik. Aki Patih ukur ngalieus, teu ngaenyakeun atawa sabalikna.
Ngadadak bae, obrolan kapegat ku ting kurunyungna tilu senapati. Maranehna ngalaporkeun yen naon-naon anu ditulis tina lawon bodasteh bener ayana. Yen ditapel wates, aya sabubuhan layon anu geus meh teu biasa disidikeun. Ngan lamun ningali kana papakean jeung palindung panah, anu naplok lebah dada.. jelas, maranehnateh mangrupa Prajurit-prajurit sunda anu gugur.
“Jadi… lamun kitumah, bener atuh ancaman siInjukkawung anu dikirimkeun lewat peso tenggorteh, Akipatih? Pantesan geus hamper dua warsih pasukan anu diarep-arep datangteh taya ngurunyung, dasinghoreng gening malah gugur leuwih tiheula…”
“Sadaya-daya, nun…”
“Akipatih kumaha lamun geus kieu?”
“Urang cobaan usul kiWidura tadi, urang sebarkeun sababaraha tulisan ditempat-tempat anu sakira bias kabaca kunu jadi musuh…”
“Tapi iraha, akipatih…”
“Sagancangna, alo Prabu…”
Gancangna carita, isukna sakumaha anu geus diusulkeun ku kiWidura tilu senapati cameti galling anu nelah kiSugri, kiRisang jeung kiBaran mimiti napel-napelkeun langlayang kasakuliaheun karaton. Malah nepi ka luareun karaton oge sarua dipasangan, nu dipalar pihak siInjukkawung daek nembongan, atawa ngajawab kana kahayangna Adipatisura saparakanca.
Tapi tetela sanggeus didagoan nepi ka saminggu lilana, pihak siInjukkawung taya malesanan. Tongboroning aya malesanan, euweuh ringkang-ringkangna acan. Teuing ngarasa gimir atawa memang ngahaja, sangkan sang adipati saparakanca bener-bener kateken tur prustasi. Pihak siInjukkawung siga nu bener-bener apal kana pibahayaeun, maranehna siga nu nyaho keur pada ngadodoho ku pihakna juragan Adipatisura.
Kocap dina hiji poe, kabeneran kiWidura keur mariksa sakuliah guha. Damanehnamah cenah diwenangkeun ku juragan Adipatisura, pikeun mariksa sakuliahna. Bet kabeneran manehna ujug-ujug tepi kahiji palataran, pernahna aya diluar guha teu jauh di biwir gawir.
Keur anteng lurat-leret kitu, bet hawar-hawar kadenge sada anu inghak-inghakan ceurik, sakapeung eta sorateh kadenge sakapeung deui henteu. Siga nu ka bawa angin ti jauhna.
Hanca
Komentar
Posting Komentar